曹蕙蘭洪杰貼身開波

樂壇新人曹蕙蘭與英皇歌手洪杰相約篤波傳情，貼身教波的洪杰更體貼地餵女方飲凍奶茶！其後兩人再睇車及BB用品，洪杰還笠上BB帽扮超齡巨B。

從主持界轉戰樂壇的曹敏莉妹妹曹蕙蘭（Mable）日前被拍得現身九龍灣一間桌球室，原來約會對象正是英皇歌手洪杰！兩人在門口會合後雙雙入內「開波」。現場所見，洪杰篤波功架了得，在旁睇表演的Mable一臉欣賞之情，不時拍手歡呼！一輪熱身後，洪杰貼身指導桌球初哥Mable，更不時「出手」糾正對方姿勢，Mable成功篤入一球後，即興奮與他擊掌。體貼的洪杰見Mable篤得興起，主動遞上凍奶茶餵飲，兩人態度親暱，儼如一對小情侶！

兩人其後到九展車場睇車，不時對靚車指手畫腳，更與經紀密密斟，並跳上心水靚車試坐。其後Mable又拉洪杰行BB用品店，相信是買禮物給快將出世的姨甥仔，期間洪杰戴上BB帽扮超齡巨B，冧招成功逗笑。

情如兄弟

事後記者致電Mable，問到是否與洪杰蜜運中？她說：「好朋友啫！可能大家都喺外國讀書，幾啱嘴形，知佢篤波叻所以切磋吓。（發展機會？）唔會啦！識咗好多年，要發展早就發展咗，我鍾意大隻啲嘅男仔。」洪杰亦指兩人似兄弟多一點：「佢性格好豪邁、男仔頭，我哋似兄弟多啲！」