周秀娜延期攻日

日本發生地震引發核災難，令不少藝人在當地的工作暫時叫停，周秀娜經理人Roy表示，周秀娜原定本月及下月的日本工作都要延期︰「原來今個月要飛去影雜誌相，同埋下個月出席嘅品牌活動都取消咗，日本工作最少要停三個月至半年，等嗰邊嘅公司通知，不過我哋一直都有同日本方面保持聯絡，佢哋都研究緊幾時會恢復工作，大家盡量配合！」而曾親歷日本大地震的Angelababy（楊穎）在日本的廣告及雜誌拍攝已叫停，但原來本月她已在日本推出新歌，日本工作開始逐步恢復過來。現正在北京拍戲的她，透過經理人表示若有日本廣告會如常接拍，亦會隨時返日本，不過工作亦有可能會遷就其檔期，改為到香港拍攝。

另外，何潤東的日本音樂會亦因地震取消，不過隨着旅行團開始恢復，其音樂會鐵定七月三日再舉行，他覺得要呼籲歌迷可前往旅遊：「唔好人哋有困難就離佢而去，都要關懷佢哋。（擔心核輻射？）冇問題，日本人都喺嗰度住，我有朋友喺嗰邊生活係冇問題，當日我音樂會搞唔成，歌迷可以攞住票尾再返嚟！」