裙星熱捧Pattern熊黛林Amanda S.高層次

女星及名模近日紛紛穿上多姿多采Pattern的裙子，增添夏日色彩。舞台服裝設計師姚志康認為，若穿上Pattern裙子，需留意顏色、髮型及鞋履是否合襯，否則名模都會變師奶，他大讚諸葛梓岐和熊黛林着出層次感，反而Rosemary穿得不倫不類。

Amanda S.有型Sharp醒8分

「呢隻桃紅色幾『蝦』人着，唔係人人着得好睇，好彩Amanda皮膚白襯托得起，令佢Sharp晒同有型，若然對鞋襯埋淺灰色更好，但未必人人Carry到呢隻色，有啲女星着咗可能由型變土，一線之差。」

熊黛林膚白腿長9分

「佢身材高挑，着乜都靚，但呢條裙好『蝦』人着，佢勝在皮膚夠白，所以都Carry到，若然皮膚太黑就易出事；加上佢條腿好修長，着得好好睇！」

諸葛梓岐時代感重8分

「條裙嘅Pattern幾靚，有拼貼效果，裙腳位置仲拼咗另一塊布，營造出唔同層次感，時代感重咗，唔會變娘，佢着衫愈來愈有自信，今次着得有型有款。」

陳敏之唔嗲唔吊6分

「條裙太普通，圖案亦有啲老土，隻顏色又『唔嗲唔吊』，其實佢個樣OK o架！靚咗好多，其實佢可以再大膽啲，依家似普通OL出街咁，欠缺星味。」

湯唯對鞋出事7分

「條裙本身冇問題，有唔錯嘅拼貼效果，只係對鞋出事，佢應該着番對高踭鞋襯條裙，最好係Shocking Pink，可以加強夏日色彩，但依家佢着到好似平時落街咁，爭少少。」

Mandy Lieu貴氣青春9分

「好清純，個Pattern好多蝴蝶，好有夏日氣息，似一個貴氣又青春嘅公主，睇落好舒服。佢好醒目，着咗對高踭鞋，更加凸顯佢條腿好靚。」

Rosemary全盤錯配4分

「條裙無論顏色、Pattern，以至對Boot都係錯配，呢隻顏色幾難襯，太沉，而且對Boot唔長唔短，顯得佢對腳肥咗，其實佢可以襯番Colorful嘅珠鏈，中和番沉悶嘅顏色，以及轉移視線，今次配襯出事。」

呂慧儀凸顯膊橫5分

「有Pattern嘅嘢唔多啱佢，反而淨色打扮仲好睇，因為佢塊面較方，一多Pattern就易變娘，今次顯得佢個膊好橫，有啲大份，加條幼頸鏈，或者下次着Deep V，效果更好。」

服裝設計師姚志康Profile

著名舞台服裝設計師姚志康（AndyDaniel）曾與圈中不少歌手合作，包括衞蘭及鄭希怡等，亦曾為黎明演唱會擔任形象顧問。