Macy一巾有情 Fans變老友
無綫藝員陳美詩（Macy）手上的愛心頸巾，雖然不是名牌貨，但她卻視為「無價寶」。Macy指頸巾是第一份收到的Fans禮物，當時她尚未正式入行，只是兼職做模特兒，但送頸巾的女Fans卻獨具慧眼，被Macy的甜美外表吸引，Macy說：「佢對我好好，我哋已經由偶像同Fans嘅關係，變成朋友，佢有我電話，大家得閒就會傾偈，好老友。」
Macy表示頸巾是七年前的聖誕節前夕收到，當時她相當感動，完全感受到Fans的誠意及心思，由於太珍貴，她也不捨得戴：「因為我怕整污糟同整唔見，所以戴過幾次之後，就將條頸巾收好，擺喺櫃度，得閒就攞出嚟摸吓，回憶呢段友情。」
現時Macy的Fans Club已成立兩年，約有逾百名會員，但因她工作忙，一年只可舉行一至兩次聚會，她亦深感內疚：「其實我冇時間陪佢哋，好抱歉，惟有多啲喺網上同佢哋交流，作為少少嘅補償。」
Macy的頸巾是她收到的第一份粉絲禮物，難怪愛不釋手。