Mandy Lieu拋達文西解畫

索模Mandy Lieu要愛情又愛「麵包」，女星爭相嫁富二代入豪門，她則以睇達文西名作來比喻，坦言不恨變闊太；寄情工作，反而滿足，更從拍攝團隊中找到家人的感覺，此刻，她直言已覺幸福！

想愛就愛唔會Hide

混血名模Mandy Lieu去年初回復單身，內外兼備的她不乏裙下之臣，今年初被拍得與G.E.M.的外籍唱片監製Lupo Groinig逛超市買餸，兩人外形相襯，旋即傳緋聞，但她澄清只是朋友。上月她26歲生日，Lupo為冧壽星女出動Mini Cake攻勢，但她仍僅以「街坊」稱呼對方。

今次訪問再問與Lupo的緋聞，廣東話不太靈光的Mandy斬釘截鐵地說：「講咗成千次係Friend！（發展機會？）唔知下年會發生咩事，一切順其自然，總之我依家係單身。（拍拖會公開？）有我會講，唔會Hide，我個人係就係，唔係就唔係。」至於未來男友會否再選圈中人的問題，並不在她考慮之列。

不少女性自小憧憬做幸福少奶奶，作出人生規劃，譬如說25歲結婚，30歲前生仔，但這些於Mandy的字典內卻通通不存在，對她來說，着眼現在最重要：「我做好手頭上工作已經好開心滿足，自細冇話諗過將來會點，好似15歲嗰時，冇諗過18歲會嚟香港做嘢，18歲冇諗過廿幾歲會做主持，我係個完美主義者，總之依家做嘢做到最好就開心。」

否認行性感搶灘

主持時尚生活節目的Mandy，因工作關係接觸到不少靚嘢、貴嘢，眼前浮華會否驅使她有衝動嫁入豪門？她嗤之以鼻說：「靚嘢係用嚟欣賞，我見過Leonardo Da Vinci（達文西）嘅名畫《Mona Lisa's Smile》，唔通會想搬返屋企？靚嘢睇過、接觸過已經好好，唔一定擁有先快樂。」她強調每日做自己喜歡的事已經心滿意足。

最近三不五時便見Mandy於報章出現，緋聞似是跟曝光率掛鈎，她卻不覺如是：「之前出Trip拍嘢，過年之後先喺香港，我冇靠咩嘢上位，我一直做緊Mandy Lieu，行騷做Event。」至於頻頻性感示人的她表示從沒想過以「事業線」搶風頭，還搬出時裝理論擋駕：「我鍾意靚啫！着靚衫令我好有自信心，一件衫嘅Cutting好重要，主持節目識多咗Design嘢，好嘅Cutting先騷到好線條。」又強調揀衫只求舒適：「唔關行性感事，只係件衫靚，着得舒服，自己又鍾意就OK。」

工作環境遇「家人」

兼任模特兒及主持已有兩年時間，Mandy感恩工作上一直有新挑戰，讓她有進步空間，至於最難忘的經歷，她一臉滿足地說：「同班Crew合作已經兩年，大家好了解大家，好似小家庭咁，每次出Trip都好似同屋企人去旅行。記得有次去哈爾濱，天氣好凍，我見有工作人員隻手凍傷，好心痛！雖然拍嘅過程辛苦，但夜晚大家圍住張枱食飯好開心。」在她眼中，「家人」一起體驗生活已是天大幸福，並說：「生命係節日，任何嘢值得去做都會試，浮誇啲講，我覺得同班Crew做嘢，日日好似Family Day一樣。」Mandy離開老家馬來西亞來港工作，在異鄉卻找到「家人」，難怪感觸甚深。

重複Chok唔覺悶

十多歲便投身模界，工作不外乎行貓步、擺甫士、Chok表情拍照拍廣告，但Mandy從未覺悶：「好鍾意做嘢，唔覺有壓力。（重複擺甫士好悶？）影每輯相都好Excited，因為每季都會有新設計着，每個攝影師都有唔同風格，我有好大空間去發揮。」近年不少中外模特兒來港搵食，例如最近憑「峯」上位的潘霜霜、「Canon甜心」Alice B.等，Mandy輕鬆地說：「有錢大家搵，冇嘢好爭，每個人性格、優點唔同，多咗選擇畀啲廣告商添！」

後記：心口都要防曬

模特兒時刻都要保持完美姿態，Mandy連減壓亦以靚行先：「我只要浸浴同敷Mask就可以消除煩惱。」拍攝當日她見到Lancome的天然有機防曬BB Eye Cream，即雙眼發亮變身美容達人：「防曬真係好重要，曬太多會令黑色素沉澱，仲會令皮膚失去彈性，好多人以為搽面就得，其實眼同心口位都要做足防曬。」