子丹晒「口技」搞濕詩詩

「宇宙最強」甄子丹前晚為愛妻汪詩詩炮製驚喜生日派對，並即席獻唱D.I.Y.英文情歌冧老婆，令詩詩感動落淚變「Wet妹」！

出名是「愛妻號」的甄子丹，雖然忙於在內地工作，但為慶祝老婆汪詩詩30歲生日，前晚專程回港及豪花6位數港元在君悅酒店舉行神秘生日派對冧老婆，圈中好友呂良偉、楊小娟、杜汶澤夫婦及黃百鳴夫婦等均畀面到賀，阿澤夫婦更笑言子丹富甲一方，不知該送甚麼作賀禮。

由於生日派對以詩詩最愛的「閃星星」為主題，故子丹夫婦均以「宇宙最閃」造型亮相，子丹身穿銀西裝襯閃爆銀髮，壽星女則穿上閃片長裙現身。派對中，子丹冧招盡出，除了專誠在文華酒店訂製生日蛋糕外，又向每位賓客送上卡通畫像，更深情獻唱親自創作、與老婆洋名同名的英文情歌《My Cecilia》，掀起整晚高潮！雖然歌詞用字簡單直接，與其多元化功夫大相逕庭，但觀乎子丹獻唱時充滿愛意，詩詩聽罷當然「直豎拇指」兼感動落淚，並說︰「我咁大個女都未試過忍唔住喺咁多人面前喊，真係第一次！」

寶貝仔女跳舞賀壽

此外，子丹與詩詩的一對寶貝仔女James及Jasmine，分別在台上獻唱及畫畫賀媽咪，James更扮已故流行曲天王米高積遜跳舞，令全場拍爛手掌。子丹受訪時透露派對筵開6席招呼親友︰「今次搞呢個Party擺咗6圍，其實時間好倉促，因為我喺內地做嘢。其實老婆之前只係知道有呢個Party，唔知我準備咗咁多嘢，哈哈！」