阿B勸放低B女嬲爆

阿B（鍾鎮濤）前妻章小蕙日前到警署報案稱大B女嘉晴被襲擊，昨日阿B回應事件時直言希望前妻不要再迷戀，而嘉晴則坦言「好嬲」！

新聞女王章小蕙的妹妹章小婉早前與阿B女友范姜發生爭執，事件鬧得滿城風雨，章小蕙與阿B的一對子女嘉浚和嘉晴幫理不幫親力撐范姜。而早前回港的章小蕙一直拒絕回應事件，不過日前卻到警署報案稱女兒嘉晴被襲，但又突然於昨晚離港。

昨午12時40分，阿B拖着行李步出寓所，問到前妻章小蕙向警方報稱女兒被襲擊？他說：「我有睇報紙，大家有眼睇，細路仔有事自己會講，我唔想喺呢件事打圈。（章小蕙話有社工同傭工供詞？）有咩事細路仔會出聲，嗰個唔係兒童，我個女16歲喇！」他表示警方仍未聯絡他。問到章小蕙有否找嘉晴？他說：「冇呀！我覺得已經十幾年啦！應該要放低，唔好再迷戀喇！我哋成家都好開心，我希望佢早啲搵到好歸宿，咁就大家Happy喇！」其後他乘車離開往外地工作。

承認曾見社工

至於嘉晴昨午近4時放學回家，她表示知道媽咪報警：「我都知呢件事，我冇畀人襲擊，好嬲！（媽咪有冇搵你？）冇！（警察有冇搵你？）冇！（係咪有社工供詞？）唔知道！（學校有冇搵過你？）今日社工搵過我，媽咪畀資料佢哋。（主動聯絡媽咪？）唔會！（同媽咪傾？）唔會！（叫媽咪收手？）我唔講咁多喇！」問到想不想與媽咪見面？嘉晴則沒有回答。直至傍晚6時半，范姜與再次外出的嘉晴購物後乘七人車返家，對於章小蕙報警一事，兩人只笑而不答。

叫媽咪收手

直至昨晚，嘉晴在Facebook上繼續向媽咪發炮：「我唔介意佢拋低我自己走咗去美國，但係點解要咁做？……我知道佢想引起人注意，但係唔該唔好再做埋呢啲嘢。我哋好愛大家，冇人可以拆散我嘅家庭！我唔係自閉，亦都唔係五歲細路，我有自己想法會發聲，我已經唔係佢上次見到嘅九歲細路，我真係唔明點解佢要咁做！」

另外，阿B昨日在微博上載與范姜的合照，他刻意在嘴角黐了一粒白飯，並寫上：「十多年前結束了第一段婚姻……照顧女兒的責任一直落在范范身上，轉眼嘉晴已經16歲……感謝范范無怨無悔的付出，感恩！」好兄弟譚詠麟則留言：「冇錯！我們做朋友的是有眼見的！」