四哥搶贏拉姑開餐賀鋒帝

謝霆鋒封影帝後,前晚相約好友飯敍慶祝,被指打爛醋埕的狄波拉繼續失蹤,相反老竇謝賢剛巧「路過」玩埋一份。

憑英皇電影《綫人》榮登今屆金像影帝的謝霆鋒,休息一晚後隨即出動,前晚相約好友如蘇永康、梁漢文、何超儀、葉佩雯、郭偉亮及李璨琛等到灣仔飯局慶祝,席間不忘拍照並上載至微博「公諸同好」。一班人狂歡至深夜時分才散席,離開時栢芝先登車,霆鋒則逐一與好友擁抱道別。

飯局上雖未見狄波拉(拉姑)蹤影,反而謝賢(四哥)則與年輕人打成一片。可能深怕奶奶的「心噏」進一步升級,栢芝隨即透過助手於微博留言,待拉姑由內地返港便一家人正式食一餐。搶先一步的四哥昨日接受記者電話訪問時亦幫口解畫:「邊係霆鋒請我!我啱啱約咗朋友喺隔籬,聽到附近點解把聲咁熟,咪走過去睇吓囉!好彩新抱(栢芝)識做叫我坐低,如果唔係連位都冇得坐呀!」他打趣地表示因兒子已捧他上天,故不會因事前未獲邀飯敍而發嬲:「嬲乜?咁佢哋年輕人世界嘛!(拉姑嬲喎!)唓!佢喺我手掌十幾年,咩脾性我唔知?佢邊係嬲,只要傳媒唔好再『撩嘢講』就得!(拉姑返嚟再食飯?)我諗會啩!」

否認拜四面佛求獎

昨日有指栢芝於頒獎禮前,曾到泰國拜四面佛為老公「求獎」,其經理人代否認:「佢哋一家又唔係第一次去泰國,乜嘢都有人傳!就算栢芝澄清咗依家冇BB,今日咪仲有網民喺度質疑佢佗BB女!」

另一方面,無綫日前公布亞視播放金像獎的平均收視只得7點,亞視隨即指有人以「虛假」結果攻擊。CSM媒介研究、香港廣告商會及電視廣播有限公司昨晚發出聯合聲明,指此言論有損名譽,保留法律追究權利。亞視高層葉家寶表示未了解聲明,稍後再作回應。

影視組

栢芝離開時怕醜避鏡頭,不想搶影帝老公風頭。

霆鋒慶祝稱帝High到爆,最後與梁漢文擁抱道別。

霆鋒勇奪影帝,栢芝表示等拉姑返港後便一齊慶祝。