祖兒「頭貼頭」冧排球型男
容祖兒將於本月底在英國舉行演唱會，日前特別抽空為「第三屆全港運動會」灌錄主題曲及與多名本港運動員拍攝宣傳片。昨日祖兒穿上黑白橫間連身長裙出席記者會，除即場獻唱主題曲外，還與擁有202cm身高的香港男排球員許培德分享拍宣傳片趣事，期間她變身陳奕迅主動撩許培德「吹水」，更多次將頭貼在對方膊頭，氹得許培德笑逐顏開及要求用手機影合照。
問到是否對許培德嗒糖？祖兒笑說：「高度唔係問題，最緊要胸襟廣闊。（唔可以矮過你？）咁就過火啲，不過有啲矮人好有台型同霸氣，有先算啦！」問到現時是否不諗拍拖？她嘆氣說：「冇乜所謂，唔係唔搵，唉！」她透露不時做運動強身健體：「呢排喺屋企跳健康舞。（球類白癡？）少少白癡，最叻打羽毛球，執波都幾攰o架！」隨即忍不住哈哈大笑！
祖兒不但主動「攀」談許培德，還將頭貼在對方膊頭上。
穿上黑白橫間連身長裙的祖兒，紮紮跳演繹運動會主題曲。