學友腳軟抖完再唱
歌神張學友前晚於紅館完成首五場《張學友1/2世紀演唱會》，完騷後他換上運動服受訪，期間不留神跣腳坐落布景板前，幸未有受傷，他亦忍不住自嘲：「做完騷真係腳軟，好正常吖！」他坦言對過去五場演出曾經感到有丁點兒疲態，幸已慢慢習慣：「今次特別安排演唱會間斷，會放假，呢兩日會好好休息，養好把聲，等個人精神啲再繼續！」
早前學友呼籲圈中好友以捐米代替花籃，獲陳慧琳、容祖兒及謝霆鋒夫婦等數十人響應，合共已籌得七千多公斤的白米，將交到聖雅各福群會捐助有需要人士。學友透露兩位愛女都有份支持，更到場睇騷：「佢睇完上海站之後，仲問我點解畀舒淇打！」
提到日前失落金像獎最佳男主角獎項，學友坦言不失望：「入圍已經好意外，我當攞咗o架喇！（謝霆鋒贏咗你哋班前輩？）咁咪代表學無前後囉！做戲要畀心機先得，我自問唔夠，冇獎係應該！」
學友跣腳坐落布景前的「米陣」，幸好未有受傷！
Kelly響應學友呼籲，以米代花賀他開騷。
學友與電影拍檔湯唯雙雙失落金像獎，但他自言不失望。（資料圖片）
在騷上表演一字馬的學友，笑言大女兒亦能做到。（資料圖片）
