歌手兼新城DJ范振鋒與無綫小花李思欣秘密撻着4個月，兩人不時在微博傳情晒幸福。本報昨日致電兩人求證時，范振鋒甜笑承認戀情：「咁都畀你哋發現！其實大家識咗幾年，不過正式開始係去年除夕新城活動之後。」他大讚女友純品兼人靚聲甜。而思欣則玩踢爆：「其實佢幾年前已經暗戀我啦！（男仔表白？）梗係啦！我唔會主動o架！」她續說：「圈中有幾位朋友已經知道，而且成日會一齊出街。」對於最近興閃婚，兩人說：「應該唔會，都四個月喇！結都唔係『閃』啦！」
李思欣和范振鋒經常在微博晒幸福，因而被踢爆戀情。
