莫少聰捲毒禍新片隨時Foul

莫少聰與孫興在北京涉毒被捕，未定罪已影響星途！聰仔隨時被Foul出新片《光輝歲月》，監製熊欣欣承認今日會開會決定是否易角，而製片人韓欣利則直言若聰仔涉毒會考慮換人！

莫少聰涉毒一事大大阻礙星途，他本於8月拍攝新片《光輝歲月》，但現時大有機會被Foul走！據知聰仔已跟片商傾好，只欠正式簽約，《光》片監製熊欣欣承認今日會到北京開會商量是否換人：「我聽到呢件事好Shock，之前同佢喺北京開會食飯，都唔覺佢係咁！」而製片人韓欣利則表示曾與聰仔在橫店拍戲，對方即使夜收工都堅持跑步，但若他真的涉毒，會考慮換角！

酒量突然增加

聰仔與孫興在娛樂圈交遊廣闊，與他們相熟的曾志偉、吳啟華、張國強及何家勁等，得悉好友被捕紛表震驚，並撐聰仔生活健康。其中吳啟華前晚已收到消息，他說：「我唔信聰仔有不良習慣，佢係虔誠佛教徒，早前玉樹賑災又到西藏行善。如果留案底會好麻煩，我好擔心！（成日一齊飲酒？）喺北京有飲過，突然見佢比之前飲得，但內地嘅酒局、飯局有好多陷阱，朋友太多識唔晒，唔知人哋畀咩你食或飲，好易出事。我相信聰仔絕對係貪玩，可能人哋畀佢食啫！（同孫興都熟？）喺亞視合作過《還看今朝》，最近喺北京一個活動上見過一次，唔算好熟！」

曾志偉撐健康

至於曾志偉昨午才得悉朋友出事：「唔知詳情，但非常關心，聰仔同黃日華、苗僑偉都非常老友。（佢平時有咩嗜好？）佢好健康，又跑步，Fit到唔似真實年紀。（知佢喺邊度畀人拉？）唔知，有人話屋企，有人話夜總會，唔知朋友有事定佢有事。（聯絡佢？）搵唔到，有喺微博留言但冇回應。」而老友陳雅倫亦不相信聰仔涉毒，並在微博呼籲大家支持他。

孫興大半年前與鍾欣桐等合作的劇集《女媧傳說之靈珠》最近在江蘇衞視播映，收視高企，劇集導演蔡晶盛說：「咁大鑊？咁點搞呀！我覺得佢個人好開朗、好好玩。（佢有冇不良嗜好？）應該冇啩！拍完劇私底下冇聯絡。（致電了解？）我冇佢電話。」至於孫興助手王先生卻否認孫興涉毒，並解釋孫興正在拍戲才沒有開手機，但又拒絕讓記者與孫興直接對話。