嘉玲鬥戲20年 開齋封后

《第30屆香港電影金像獎》昨晚圓滿結束，霆鋒憑英皇電影《綫人》一擊即中，首度封帝，太太張栢芝在台下喜極而泣，並表示會「造人」慶祝！影后則由曾五度「食白果」的劉嘉玲首次奪得。

影壇盛事《第30屆香港電影金像獎》昨晚假尖沙咀文化中心舉行，去年憑《十月圍城》獲得「最佳男配角」的謝霆鋒，今年「升呢」成功，事前獲愛妻張栢芝「芝」持及三屆影帝周潤發「加持」下，憑《綫人》的出色演技揮低發哥、張家輝、張學友及梁家輝四位前輩，首奪「最佳男主角」！當他得悉獲獎時，即時Chok爆3秒，並攬實栢芝，並在台上說：「多謝太太，You are beautiful tonight,not just tonight,but specially tonight！多謝英皇電影，我18歲攞新人獎，當時同爸爸一齊住，跟住我返屋企，佢就同我講，佢拍咗幾百部電影同電視劇，我問佢你有冇攞過金像獎，跟住成個獎擺喺枱度！佢依家喺屋企睇電視，呢番說話『銀』咗喺心裏12年，希望佢唔好放喺心入面，原諒呢個不知天高地厚，冇禮貌嘅小朋友，要養大一個咁麻煩嘅小朋友，仲可以笑面迎人，你先係最佳男主角，老竇，對唔住！」

栢芝造人慶功

霆鋒成功封帝，栢芝當然功不可抹，昨晚以密實Look與「白馬王子」霆鋒行紅地氈的她，自爆若老公稱帝會「造人」慶祝，問到輸獎將如何？她笑說：「冇獎就罰佢！（今晚返去造人？）唔好理我幾時。（係咪有咗？）唔係，呢一刻冇懷孕！」當司儀谷德昭問霆鋒為何開製作公司時，霆鋒即擺出「Chok樣」撐香港電影，栢芝則對鏡頭甜笑及擺出勝利手勢。

期間，發哥與資深電影人黃希雲任「最佳導演」頒獎嘉賓時表演棟篤笑，掀起全晚高潮。發哥笑言擔心輸給霆鋒，沒時間講感受，並盛讚霆鋒撐香港電影言論：「你上有高堂、下有妻兒，香港未來三十年電影，靠晒你！」台下的霆鋒和栢芝聞言即合十感謝！他又透露早前遇到拉姑：「我問佢（拉姑）會唔會捧囝囝場，佢藐咗我一下，我覺得佢唔啱，霆鋒咁辛苦、咁叻仔，霆鋒我撐你！」

嘉玲透底贈興

至於影后則落入大熱劉嘉玲手中，曾五度角逐「最佳女主角」的她，雖然鋪鋪食白果，但昨晚終撼贏後輩湯唯、薛凱琪、楊千嬅和何超儀，憑《狄仁傑之通天帝國》「開齋」！嘉玲獲獎時High爆說：「每次睇住人哋攞獎，習慣咗失意，今日好得意反而唔係好習慣。其實我入嚟嗰時好平靜，得失應該睇得好淡，攞呢個獎好激動、好開心，原來真係咁開心！」她續說：「我準備咗六次台詞，之前五次冇機會講，多謝徐克咁具慧眼、好大膽起用我做武則天！多謝媽咪同老公梁朝偉，佢今日比平時Send好多訊息我，咁多年嚟佢完全好自由畀我做自己鍾意做嘅嘢，一啲怨言都冇，我拍馬都追唔到你，我會慢慢追你！」而「最佳電影」則由《打擂台》奪得4獎，《狄仁傑之通天帝國》合共獲得六獎，成為大贏家。

另外，身穿Versace開胸大露背開衩長裙的嘉玲，佩戴逾億的卡地亞首飾並狂騷7千萬鑽戒，可惜長裙遭滂沱大雨濺濕，當她提起裙襬行樓梯時，更被發現疑似「透底」！

對於兒子公開道歉，謝賢笑說：「我唔記得晒喇！不過佢識講呢番說話，證明佢大個仔，我都有少少感動嘅！」

第30屆香港電影金像獎得獎名單

最佳電影:《打擂台》

最佳導演:徐　克《狄仁傑之通天帝國》

最佳編劇:彭浩翔、麥曦茵《志明春嬌》

最佳男主角:謝霆鋒《綫人》

最佳女主角:劉嘉玲《狄仁傑之通天帝國》

最佳男配角:泰迪羅賓《打擂台》

最佳女配角:邵音音《打擂台》

最佳新演員:陳奐仁《李小龍》

最佳攝影:鮑德熹《孔子　決戰春秋》

最佳剪接:張嘉輝《葉問2》

最佳美術指導:趙崇邦《狄仁傑之通天帝國》

最佳服裝造型設計:余家安《狄仁傑之通天帝國》

最佳動作設計:洪金寶《葉問2》

最佳原創電影音樂:泰迪羅賓、韋啟良《打擂台》

最佳原創電影歌曲:《Here To Stay》《東風破》

曲：恭碩良　詞：恭碩良　唱：恭碩良

最佳音響效果:王丹戎、趙楠《狄仁傑之通天帝國》

最佳視覺效果:李庸基、南相宇《狄仁傑之通天帝國》

新進導演:莊文強《飛砂風中轉》

最佳亞洲電影:黎筱娉（角川洲立集團主席）

專業精神獎:陳自強