藍男心癢想生番件

王祖藍與李亞男昨日分別出席活動，但不約而同表示喜歡小朋友，祖藍更表明恨做老竇，又隔空激讚女友「無限分」。

王祖藍與李亞男公開戀情後，從不介意在人前打情罵俏，昨日兩人分別出席兒童活動，祖藍乘機隔空施冧功，激讚女友是「無限分」。王祖藍與李紫昕出席《喜羊羊與灰太狼3之兔年頂呱呱》宣傳活動，與小朋友大玩遊戲，祖藍相當受歡迎，他透露早前和女友結伴幫鄺文珣湊BB，問到是否提早「實習」，他哈哈大笑，坦承恨做老竇：「都幾恨o架！呢排做緊嘅嘢都係圍繞愛情同家庭，身邊又咁多人結婚生仔。」

激讚女友無限分

問到會否提早求婚，祖藍說：「佢未準備好，要佢攞咗『飛躍進步女藝員』先，咁我就會積極準備，要門當戶對嘛！」他透露女友湊BB得心應手，問到會否因此加分？他不怕肉麻地說：「佢冇得加，佢本身都係無限分，再加都係無限分。」

出席另一公開活動的李亞男，坦承過往曾教主日學，對教小朋友有心得，問到婚後想生多少個BB？她說：「最好都要有兩個，因為我細個得一個人，好想媽咪買隻狗仔陪我，最後媽咪喺我11歲嗰年生咗個妹妹，妹妹梗係好過狗仔啦！」