江若琳余文樂忙掉愛情

「80後」戀愛大過天，余文樂與江若琳雖貴為其中一分子，但仍是單身一族，感情生活未有着落！原來兩人同屬「工作狂」愛忙碌，難怪沒有異性敢埋身！

入行五年的江若琳（Elanne）由最初稚氣未除的小妮子，搖身一變成為愈見韻味的靚女，但她表示現時仍處於「求突破期」：「出道嗰陣好少女，係時候求變！依家想成熟啲，變得更有女人味。（想演乜嘢角色？）之前演過癌症病人同精神分裂者等，雖然角色好Heavy，但充滿挑戰，不過最想演都係愛情小品，純粹談情說愛。（性感演出？）唔使住，我有自知之明。睇劇本同埋導演，以及係咪真係有咁嘅需要。（露背？）都OK。」

有人追唔急拍拖

提起愛情電影，導演葉念琛可謂箇中能手，剛巧Elanne與葉導演近日因共同上載鮑魚相而傳緋聞，但她表示與對方只是好友，自爆目前單身：「我依家冇對象。（用鮑魚攻勢冧你？）隻鮑魚好好味。」她不否認現有男士展開追求，卻無奈地說：「係有人追，但知你工作情況，隔一排會周圍飛唔喺香港，講真好難同你發展！曾經有男性朋友同我講就算有人鍾意你都好難一齊，有乜理由要接受另一半間中返嚟一陣，然後又飛走呢？咁我都明白嘅，好彩唔心急。」

既然要慢慢揀，過程中當然少不免「派檸檬」，Elanne說：「真係唔夾嘅話，我只會同佢講：『大家繼續做朋友會好啲。』（同圈中人拍拖？）唔係好想，因為冇乜安全感，呢行太容易招惹狂蜂浪蝶。（揀成熟型男士？）唔好太細個囉！最緊要有才華，有才華嘅人特別吸引，外表反而唔係重點。（發展中港姻緣？）都好喎！隨緣啦！」

愛情未有着落，相反工作滾滾來，Elanne透露稍後會往新加坡與歌手阿牛拍攝電影《結婚那件事》，以結婚過程為主題，她笑言可藉此感受籌備婚禮的煩惱事。問到會否憧憬童話式婚禮，她直言不需要繁文縟節：「邊睇劇本邊忟憎，將來考慮會旅行結婚，今次就當預演一次。」

賺人仔目標置業

現時大部分藝人作「多元」發展，Elanne由唱歌進軍影視界，近兩年更中港兩邊走。談到內地及香港工作模式及文化，她直言有很大差異：「內地少啲狗仔隊！香港多數以緋聞同八卦新聞為主，內地反而講工作多啲。（習慣內地工作？）依家習慣晒！酒店先係我屋企，反而返到屋企就好陌生。（北上吸金豬籠入水？）仍然努力中，我想喺香港買樓畀家人，同時亦想買車，因為最近考到車牌。」

無綫劇集《洪武三十二》近日播出，飾演永暘公主的Elanne讚角色具層次感：「由開頭好百厭、野蠻同任性，到後來充滿經歷，變得愈來愈穩重。（係自己縮影？）少少啦！（瓣瓣掂？）唔係，只係樣樣都好鍾意，我鍾意忙，係工作狂。」對於影視獎項，她表示只會平常心對待。

Elanne曾與余文樂合作拍攝《童眼》，對於阿樂睽違六年再度出專輯，她也替對方高興。《童》片亦撮合與楊丞琳的友誼，她說：「好渴望再同佢合作。（八卦佢啲新聞？）佢會同我講啦！」

後記:捨長取短

出道至今，江若琳的長髮一直是其Icon，但她日前忍心一剪，轉以清爽及肩的短髮示人，效果相當理想，印證她肯「求變」心態，她說：「我都好滿意新髮型，雖然留長髮都好，但做人有時要轉變吓。」

型男余文樂早前無辜捲入「Y字頭愛滋男星」風波，但他無懼流言蜚語，繼續忙碌工作。近年主攻電影的他，今年再拿起咪高峰，借新專輯主打歌《不是明星》吐心聲，詮釋藝人撲面而來的壓力。剛巧碰上負面新聞，唱起這首歌時會否特別「入戲」？他說：「我唔覺得係負面新聞！都唔關我事，嗰啲係無聊新聞，發聲明係同客戶有個交代，畀信心佢哋知道同我無關。大家應該正視一下，亂咁講嘢對一個Artist會有幾大傷害，冇根據就唔好亂寫！」雖然相隔六年再踏入錄音室，但樂仔毫不怯場，信心地表示一直Keep住鍛煉歌喉：「識放鬆好緊要，唔好畀自己太大壓力，如果唔係會弄巧反拙。今次好用心咁做完一隻唱片，希望觀眾感覺到誠意同心血。」

渴望接拍戰爭片

身形高大的樂仔由模特兒出身，繼而加入娛樂圈，歌、影、視三線發展，近幾年主力瞓身大銀幕，去年更主演多部電影如《志明春嬌》及《童眼》等，口碑與票房均比08年的《軍雞》及《青苔》出色，問到是否近年傾向揀「大路」電影，他說：「冇變過，好就拍！唔會每部戲都叫好叫座，觀眾喜歡與否好難控制。我覺得收唔收得唔關係大定小製作嘅事，係要天時地利人和，好似《志明春嬌》都唔係大製作啦！（演技好咗？）演技嘅嘢要慢慢學習，的確近年外界反應係大咗，但都要夾啱導演同題材中觀眾口味。」

拍戲近十年，乖仔與衰仔均演過，War Game發燒友的樂仔渴望接拍如《集結號》般的戰爭片。雖然《志》片未能為他帶來今屆《金像獎》最佳男主角提名，但該片仍是他最滿意之作：「夠自然，唔似睇表演，好似兩個人嘅紀錄片咁！演得自然其實唔係咁容易，綵排同準備都要好多。」

身為圈中靚仔，樂仔入行後傳出不少緋聞，但近年好像變成絕緣體，忙碌工作以外，多數見他與邊爐之友、車迷及波牛為伍，鮮有靚女傍住身邊！今年即將踏入三十歲，問到媽咪有否催婚嗌恨抱孫，樂仔耍手擰頭說：「冇咁緊張，佢都知我而依家係搏殺期！」

買辣跑獎勵自己

經常與沈嘉偉、張智霖與郭富城等打邊爐「滾友」邊淥肥牛邊講車經的他，早前一擲三百多萬元購入林寶堅尼超級跑車，夠晒豪氣，對此他說：「好似女仔鍾意玩公仔，男仔就鍾意車！我好細個就鍾意玩玩具車。（買靚車感覺良好？）係其中一樣興趣同減壓方法，買自己鍾意嘅嘢係為咗辛苦工作完氹吓自己，再畀動力向目標跑！」

身為愛車之人，收藏的靚車當然不止一部，不過他未肯透露愛車數目。靚車在不少人心目中好比「老婆」，如果香車與美人只可揀一，身為超級車迷又會點揀？他以光速回應：「梗係揀人啦！（咁爽快？）唔通要車唔要阿媽咩！人係人，死物係死物，車呢啲嘢好死o架啫！唔要就唔要！」

後記:一休大師

訪問安排在傍晚進行，記者打趣地問樂仔是第幾個訪問，一臉疲態的他說：「好多個，都唔知第幾個！」影相時馬上進入狀態Chok出酷樣，但完成後即趁空檔在梳化上九秒九內瞓着，印證明星不易做！