祖兒婷婷綻放春色

每年春夏季，女星衣着百花盛放，花枝招展。星級形象指導郭慶彬（Ricky）及名模莊思敏今次雙劍合璧，齊齊品評女星衣着，Ricky大讚容祖兒穿起剪裁簡單的紅色連身裙如鮮花般艷麗，而莊思敏則欣賞穿上長裙的謝婷婷，充滿夏日氣息。

容祖兒Sharp醒奪目　9分

Ricky評語：「套衫雖然剪裁簡單，但佢Carry得好靚，加上Lace絲襪同啡色鞋，Match得嚟好吸引，令人一見難忘。」

Mandy Lieu 夏日青葱　8分

Ricky評語：「鮮色襯法好有夏日色彩，夾埋黃色涼鞋極富青春氣息，好Fresh之餘令人眼前一亮，Casual得嚟又有型格。」

泳兒清新爽朗　7分

Ricky評語：「好夏天嘅圖案，令人望落好舒服，亦都好襯Vincy嘅短髮造型，感覺好Fresh，如果鞋可以換對淺色啲會更有夏日Feel。」

高海寧長裙累贅　4分

Ricky評語：「呢套七彩色花裙，雖然好有Summer Mood，不過條裙長度感覺累贅，而且襯色有啲奇怪，有啲老土。」

黃婉曼端莊舒服　8分

莊思敏評語：「望落唔錯，幾舒服，感覺端莊唔造作，好啱佢以MC身份出席呢個場合。」

謝婷婷裙膚合一　7分

莊思敏評語：「條裙好靚，加上婷婷本身膚色較深，同條裙嘅純白色好Match，不過髮型可以改為All Back，會更有夏天感覺。」

陳嘉桓頭飾古怪　5分

莊思敏評語：「睇落好有少女味同青春，但頭飾戴得太高，頭形古怪。可以換對簡單涼鞋，下身感覺冇咁重。」

林莉髮型單調　4分

莊思敏評語：「接近Skin Tone嘅衫其實好蝦人着，林莉算Carry到，但係髮型應該花多啲心思，妝亦可以重手啲，感覺會冇咁悶。」

形象指導Ricky

星級形象指導郭慶彬（Ricky）曾與那英、李冰冰、吳君如、袁詠儀和Twins等合作，時裝觸覺品味甚受一眾女星認同，經常出席巴黎米蘭時裝周。

名模莊思敏

在馬來西亞出生的名模莊思敏，在模特兒圈打滾多年，穿盡中外名衣華服，穿着甚有品味，擁有一套獨特的審美眼光。