陳茵媺豪語爭后蛻變黑天鵝

陳茵媺（Aimee）天生是一隻白天鵝，純潔如水，Aimee渴望成為「視后」，不惜由白變黑，誓要長出黑色翅膀演繹姣妖妓女。她深信黑天鵝振翅之時，就是登上視后寶座之日，而這隻初生的黑天鵝與視帝陳豪也相當匹配。

當陳豪與廖碧兒從此天各一方，我有我默默耕耘，你有你釣金龜，河水不犯井水之時，劇情又有新發展，講述陳豪遇上清新可人的Aimee，可是兩人身份懸殊，一個是城中筍盤視帝，一個只是尚待高飛的白天鵝，究竟視帝陳豪可否與Aimee終成一對，實在令人引頸以待。

雖說愛情是不分階級，但Aimee卻要高飛，不甘於做人肉花瓶，要像佘詩曼般成為視后，與視帝門當戶對。每次提起陳豪，Aimee都說：「佢係一個好人，一個Gentleman，佢成日請我飲咖啡，不過我哋真係冇拍拖！」

向妮妲莉偷師

Aimee深知乖乖女形象沒有市場，導演、監製喜歡一個有經歷、有過去的女主角，她亦夢想成為視后。要蛻變，就要徹底變「黑」，就像奧斯卡出爐影后妮妲莉寶文（Natalie Portman）一樣：「係時候要改變，就好似Natalie Portman一樣，佢何嘗唔係一直做一啲好乖嘅角色？因為一套電影，佢去學芭蕾舞，佢會好大膽咁去演出，佢會歇斯底里，我就係希望好似佢咁！」

不過，Aimee始終是一隻白天鵝，她如何改變自己呢？她說：「我本身係一個開心人，但入到角色會嘗試將自己精神分裂，去抽離依家呢個陳茵媺，只要劇情Make Sense，我唔介意犧牲，就算要我做一個妓女，我都要比其他人更入型入格！」在由白染黑的過程中，磨練心志是必然的，Aimee認為要懂得抽離：「投入角色好難抆出嚟，但我唔太擔心，儘管劇中我要同某某講我愛他，愛到佢要生要死，但係鏡頭後我知道一定要分開，一定要識分真假，如果唔係一定會癲！」

Aimee如今蓄勢待發，她沒有轉彎抹角，講一大堆做戲是我興趣的廢話，她只有一個動力，就是成為「視后」：「其實大家都有野心，大家都想做視后啦！所以無論有多少機會，我都會做好自己，望有一日可以上到呢個位。不過我知未係時候，所以暫時唔會睇得太重，做好手頭上嘅角色先！我依家先知乜嘢叫做演戲，之前一啲都唔知，但仲係喺初中階段，距離大學仲好遠，所以依家我要做一個小偷，偷晒前輩嘅演技。」

工作忙唔拍拖

倘若Aimee有天變成黑天鵝振翅高飛，飛到連理樹下遇見陳豪，那豈不成絕配？Aimee笑了一聲：「我唔答你！」但講到拍拖，她雙眼如星，除了期盼，就是期盼，可惜的是：「女仔幾歲都鍾意拍拖啦！都想有人錫，都想有人陪。不過我事業正在搏殺期，真係冇時間拍拖，我冇時間喎！就算同個男仔一齊都唔會有好結果啦！如果係好鍾意佢就更加大鑊，預期失敗，不如唔好開始，都係順其自然啦！」

後記

Aimee是一個不折不扣的可人兒，要立即變成黑天鵝，對她來說很辛苦，對小記也甚為殘忍。記得拍攝當天，Aimee佻脫地問我們（包括攝記）可否合照？「Sure！」123笑，我們就在這張寶麗萊寫上自己的名字，一人一張，然後開心說Bye！自私也要講，真的希望Aimee不要變質，永遠也是我們認識的白天鵝，開心樂觀直到永遠。