霆鋒有「芝」持熱爆影帝

每個影帝背後都有一個女人支持，今屆有份角逐金像影帝的謝霆鋒、張家輝及周潤發都會帶太太行紅地氈壯聲勢！當中呼聲最高的霆鋒，獲影后太座張栢芝調動工作撐場打氣，全力「十卜」老公稱帝！

今屆金像獎賽果明晚揭盅，最佳男、女主角爭持激烈，當中影帝之爭懸念極重！霆鋒憑《綫人》首獲提名，即捧為大熱，但被發哥及「雙輝」張家輝和梁家輝狙擊，而跟霆鋒同樣未嘗金像影帝滋味的張學友，亦可能會隨時製造出爆冷賽果。

每個影帝背後必有一個女人支持，據知霆鋒、張家輝和發哥會帶太太行紅地氈撐場。身為霆鋒老婆的栢芝十分緊張，除了上周抽空與老公揀戰衣外，更十分擔心頒獎禮當日有工作，未能第一時間見證老公稱帝一刻，最後栢芝靠無比牙力，特意調動工作準備陪霆鋒出席頒獎禮，相信霆鋒得到「芝」持，定能打下強心針首奪影帝！而張家輝太太關詠荷及發嫂陳薈蓮亦作好準備，於頒獎禮當晚為老公爭奪影帝壯膽。

遊曼谷減壓

被封為頂頭大熱，霆鋒心情難免緊張，不過他甚懂減壓，據知他與栢芝於上周揀完戰衣翌日，帶同兒子Lucas和Quintus到曼谷旅行兼曬太陽，在Siam Paragon購物時，有粉絲要求合照，霆鋒一一答應，心情極之輕鬆。返港後，由於與周杰倫合作的林超賢新片《逆戰》未埋位，霆鋒繼續忙於公司事務，沒有把獎項得失放在心上。不過，他已揀好戰衣，將會穿筆挺西裝迎戰。

Lucas屋企打氣

記者致電霆鋒助手表哥，他表示霆鋒當晚的打扮會十分型仔，問到會否帶Lucas和Quintus捧場？他說：「唔會喇！佢哋太細個，唔太方便，會留喺屋企睇直播！（對奪獎胸有成竹？）都以平常心對待，志在參與！」

另一方面，對於霆鋒有機會稱帝，琦琦和許冠文均睇好，琦琦在微博寫道：「我看好栢芝老公謝霆鋒，他的努力是有目共睹的，栢芝可把之前拿的獎給大兒子，假如霆鋒可把這次的獎給小兒子這就好事成雙了！」而許冠文接受訪問時說：「我比較睇好霆鋒，因為佢不單喺呢部電影，喺過去兩、三年嘅電影都有好大變化，以前英俊、性格浪漫，依家慢慢開始演一啲完全冇帥哥感覺、好Man嘅角色，愈演愈好，應該攞獎！」