鍾舒漫冧仔自認溫柔

出道五年的鍾舒漫，向來予人堅強獨立的感覺，惟她自言也有溫柔及善解人意一面，十足小鳥依人，她笑說：「死都要話自己溫柔啦！」

身為教徒的鍾舒漫（Sherman），緋聞不算多姿多采，最為人熟悉是她與同公司的張致恒（Steven）傳緋聞。自從以短髮示人後，Sherman予人堅強硬淨的女強人感覺，問到會否不懂溫柔？她笑說：「死都話自己溫柔啦！以前我對住男朋友，會變得好女仔，好小鳥依人o架！仲會幫男友鬆骨。（有冇對象？）依家冇呀！等候中。（想幾時結婚？）30歲左右。」對於緋聞舊愛Steven早前接受浸禮，當日有份出席觀禮的Sherman也大受感動：「佢乖咗好多，冇以前咁調皮，依家同佢都有聯絡，佢仲用番聖經內容鼓勵我。」

出書撼模

近日Sherman推出新專輯《It's a beautiful day》，新歌《Take it》獲得不錯反應，令她大感興奮：「歌詞都幾『洗腦式』，首歌充滿正能量，想話畀大家知，若然之前錯過任何機會，就應該好好把握，想做就做，人生唔係好長，今日唔知聽日事。」她表示不太擔心銷量，反而更着重口碑。除了出碟外，稍後她還出書及與友人合資開舖，工作忙碌。問到是否出書撼模？她笑說：「冇話撼唔撼，大家出書類型都唔同，但我都有留意佢哋之前嘅寫真，影得好靚，我都想趁青春留倩影，留畀將來啲仔女睇。」

文：專案組　攝：黃叔榮

場地：DNA　髮型：Daniel@Chin.G

化妝：諺童‧小白@picturesquegate　服裝：Mi-tu