呂晶晶返OL更 辣慶拍檔

盛傳與亞視高層盛品儒拍拖的亞姐冠軍呂晶晶，有指因與高層關係密切而獲優待，拍劇埋位時間如OL，星期六、日「例休」，令到同劇演員編更混亂，怨聲載道！

亞視執行董事盛品儒與04年亞姐冠軍呂晶晶拍拖的消息在公司內可謂「公開秘密」，最近拍攝鄧特希新劇《親密損友》的晶晶，因曾呻工作辛苦，故人人「自動波」配合，「升呢」享受「老闆娘」級禮遇，每日埋位時間恍如OL，加上星期六、日例休，絕對方便她約會返「寫字樓工」的盛品儒。不過，此舉令同劇拍檔、前亞姐冠軍姚佳雯墮入「天地更」，電台DJ快必更曾被指因編更及拍攝等問題跟導演鄺錦宏衝突，並一度火爆狂叫：「我車爆你個頭呀！」

「我都有天地更」

對於獲優待令同劇演員不滿，呂晶晶說：「真係冇呀！我同盛生都唔係拍拖！（你有優待？）我有得到優待咩？我都有天地更喎！（其他人嚴重過你好多喎？）唔會啩，咁誇張！（星期六、日唔使返？）我只係有一次病咗冇開工！（直接向盛生投訴？）呢啲係兩回事，我都冇晒私人時間，約唔到朋友食飯！我都要同佢哋講好辛苦！」

盛品儒否認優待

至於盛品儒亦否認優待晶晶：「我唔會過問呢啲嘢，公司亦冇特別就一個演員！」他不諱言可能因兩人的緋聞令大家比較敏感。被問到晶晶周末「例休」一事，監製鄧特希說：「咁啱冇佢通告，唔係遷就，其他演員有需要都會就！（知唔知道怨聲載道？）係咩？我到依家都冇收過人投訴喎！」