糖妹出肖像蛋蛋主動追仔

「宅男女神」糖妹（黃山怡）昨日出席活動時，自爆求學時常畫自己的容貌在復活蛋上送給心儀對象，更豪氣地說：「我不嬲都係主動派！」

人氣組合糖兄妹昨日於尖沙咀出席復活節活動，齊齊玩應節遊戲，他們先替一幅用復活蛋拼成的米高積遜畫「點睛」，再用復活蛋在畫板上拼出對方的樣貌，最後更親筆各自畫了一隻復活蛋，掛在場中的樹上，看來相當開心！

外表的骰、但性格爽朗的糖妹，自爆年少時常用有自畫像的復活蛋冧心儀對象：「我會問佢『似唔似我呀？』咁樣囉！（你一直都係主動派？）不嬲都係主動派！（成唔成功先？）唔成功，哈哈！」雖然以往甚多慘痛經驗，但糖妹竟成為時下的「宅男女神」，加上有傳與型男組合Bro 5成員Dominic甚為「老友」，看來以往曾派檸檬給她的男生，如今只能大嘆走寶！

復活節開工

復活節將來臨，不過糖兄妹並無節目：「都係工作中度過啦！錄音啦！不過都想同屋企人食飯。（錄音進行成點？）七七八八喇！好快會派新廣東歌，因為粉絲想聽多啲廣東歌！」此外，他們正積極為下月底的溫哥華音樂會排練，糖妹說：「今次不容有失！因為大家係買飛入場o架！」