祖兒望林峯遠離小人
容祖兒昨日以一身火辣紅裙出席《奧海城窩心甜品之旅》啟動禮，與信和集團商場推廣總經理蘇蔡潔蓮主持儀式，並跟歌迷齊齊布置蛋糕。
將於月底往倫敦開騷的祖兒表示，最近要積極瘦身，她說：「每晚睇DVD同阿媽一齊跳健康舞，細佬見到笑咗成分鐘，話好戇居喎！」她大讚跳健康舞比跑步機有效：「我唔會再地獄式減肥，朋友話我以前瘦到好恐怖，夜晚唔想見到我，個樣瘦到唔親切。」
前晚，祖兒與一眾英皇歌手到廣州出席《音樂先鋒榜》頒獎禮，並與古巨基各奪4獎稱霸，其後眾人拉隊慶功，問到有冇向同枱的林峯八卦他與潘霜霜的戀聞，祖兒說：「同佢飲咗兩杯，希望佢快啲遠離小人。（借酒澆愁？）酒入愁腸愁更愁！（佢仲愁緊？）冇啦！努力工作，冇乜大影響，當一個經驗囉！畀佢感受友情可貴。」對於好姊妹蔡卓妍（阿Sa）被指當日因拒生仔而離婚，祖兒說：「唔係喎！SaSa成日都話生，佢好鍾意小朋友！」
祖兒在頒獎禮慶功宴上陪林峯飲兩杯，望他盡快遠離小人。
祖兒食完蛋糕啜手指，十足大細路。
信和集團商場推廣總經理蘇蔡潔蓮（左）送上可愛公仔，令祖兒十分開心。
四獎威盡的祖兒（左四），偕英皇師弟妹慶祝頒獎禮大豐收！