姜文杰兄妹搵大碼頭攻中台

兄妹檔組合「Benji & Lesley」去年以新人身份角逐各大樂壇頒獎禮，結果收穫甚豐！最近兩兄妹決定物色簽約唱片公司，繼續勇闖樂壇！

甘草演員秦沛的子女姜文杰（Benji）及姜麗文（Lesley），以自資形式組成「Benji & Lesley」，出道以來獲不少前輩支持，令他們受寵若驚！

圈中甚少兄妹檔組合，他們坦言雖然經常鬧交，但一定不會超過一個鐘，妹妹Lesley說：「我哋性格係一有問題就即刻同對方講，唔會收收埋埋，雖然成日鬧交，但幾分鐘就會好番！」兩人相差六年，但兄妹感情要好，Benji由細到大對Lesley關愛有加：「細個時我試過作歌教佢乘數表，佢喺日本讀書嗰陣，我都會日日同佢傾電話，八吓佢搞緊乜！」

首選無綫友好

一直自資搞音樂的「Benji & Lesley」，近來正密斟簽約唱片公司，希望衝出香港，正式打入華語市場！由於Benji身兼無綫音樂節目主持，故唱片公司與無綫的關係亦是考慮因素：「我哋都好着重音樂創作同發揮空間，希望搵到間公司幫我哋衝出香港，打入華語市場！」