Mandy色襯白裏透紅Sharp

春夏高踭鞋無論顏色與款式均大膽多變，女星搶着潮鞋，星級形象指導Ricky Kwok讚名模Mandy Lieu粉紅高踭鞋潮襯簡單白裙，畫龍點睛。

Mandy Lieu 分數9

Ricky ：「Mandy着白色Tube Dress配粉紅色尖頭高踭鞋，望落覺得好Sharp、好亮麗，唔係白衫白鞋咁悶！今季興粉紅，咁襯即刻潮咗。」

鍾欣桐 分數6

Ricky ：「略嫌成熟，加黑色絲襪有啲夾硬，想將大腿顯得修長，但黑襪撞銀鞋好怪，如果飛走黑絲襪，着對黑色Peep Toe仲好。」

蔡卓妍 分數8

Ricky ：「阿Sa嘅彩藍色吊帶裙搶眼奪目，着得整個人好修長，唔似一般花裙襯黑鞋，反而潮襯彩藍色高踭鞋，藍撞藍擦出耀眼光芒。」

吳家麗 分數6

Ricky ：「感覺成熟，樣同裙襯，唔加黑絲襪淨着黑鞋靚啲，依家太黑！如果裙嘅長度及膝會比例仲好！個妝隻唇色好80年代。」

夏文汐 分數6

Ricky ：「鮮紅色斜膊裙剪裁啱身，但個Feel可以着得靚啲，個裙款唔夠時尚，只係凸顯到女人味，配銀色鞋不過不失，襯紅色Open Toe仲好。」

Amanda S. 分數8

Ricky ：「黑衫配米色Mary Jane鞋本來幾好，但裏面件彩藍色Lace背心唔係絕襯，如果換對彩藍色高踭鞋，成個Look會更討好。」

樂基兒

Ricky ：「簡單套裝本身頗成熟，但佢着得有新鮮感，大方得體，平和親切，Good Choice咁配對裸色尖頭鞋點綴，自然得嚟好Match。」

Jocelyn 分數7

Ricky ：「佢呢個Look造型散發夏天氣息，膚色襯桃紅色OK，不過不失，如果想潮啲着對露趾Wedge（船踭鞋），成個Look更靚。」

楊千嬅 分數5

Ricky ：「身上顏色太多，今季係好Hit，黃衫、綠褸、藍褲同啡腰帶襯落係靚，顏色配搭新鮮，但要睇邊個着，佢個比例着上去唔靚。」

G.E.M. 分數3

Ricky ：「佢條件唔錯，但每次打扮都過分老成，呢條女性化嘅連身裙Pattern唔討好，加埋款式一般嘅厚底鞋，唔潮唔靚。」

（10分為滿分）

郭慶彬Profile

形象指導Ricky Kwok（郭慶彬）在時裝界打滾8年，多從事廣告形象指導及經營時裝店，曾為熊黛林及樂基兒擔任形象指導，近日就忙於為名媛相展設計造型。