王菲馬詩慧千金明日之星

近年多位星級千金相繼冒起，極有潛質殺入娛樂圈，70年代紅星夫婦謝賢與狄波拉的千金謝婷婷便是最佳例子。本報邀得星級形象指導郭慶彬（Ricky）與周秀娜御用化妝師Johnathan教授「星」呢貼士，打造至索明星二代！

圈中靚女謝婷婷正是明星第二代，父母謝賢與拉姑、哥哥霆鋒與大嫂張栢芝都屬巨星級，自小在娛樂圈長大的她表示，家人從未給予壓力：「明星二代唔一定要繼承父母衣鉢，千祈唔好畀其他人或屋企人嘅壓力影響決定，入唔入行係其次，最重要識尊重呢個圈嘅文化。」

婷婷曾嘗試離開幕前工作，但兜兜轉轉還是做模特兒及拍戲，她說：「我當依家份工係Life Style一樣，好享受！由細到大，我都冇諗係唔係一定要入行，甚至試過做其他工作，但兜兜轉轉都係入番呢行。屋企人從來冇干涉我嘅想法，亦冇阻止我入行，長大之後，佢哋更加放心畀我自己決定，而且一直以嚟，我嘅工作機會都係靠自己爭取，與家人無關。」

余安安大女李文琪 22歲

父：李萬祺　　母：余安安

「星」呢指數：★★★

李文琪早於05年已偕媽咪母女檔行騷，有晒經驗，而且愈大愈靚女，遺傳了媽咪的星味。

Ricky：「佢個樣好有個性，可以Carry啲流行潮物，最啱走另類少少嘅Fashion路線。」

Johnathan：「好少亞洲人面形有佢咁靚，歐美嘅妝非常啱佢，最好嘅濃度係中等同濃少少，反而太淡會令佢冇咁精神。」

鄭丹瑞女兒Amanda 18歲

父：鄭丹瑞　　母：沙律

「星」呢指數：★★★

正在外國讀大學的Amanda，早年與爸爸出席首映禮時，以一襲Tube Dress晒香肩，非常養眼。

Ricky：「佢身形幾高大，個樣清純，好啱少女自然風格，不過佢得18歲，夠晒青春，唔好着得太老成同黑漆漆就冇問題。」

Johnathan：「佢遺傳咗爸爸嘅長面形，化妝方面可用少少Smokey Eyes令眼睛更精靈，但唔適宜打太多陰影，反而下巴位可以掃少少胭脂，令面形更靚。」

王菲大女竇靖童 14歲

父：竇唯　　母：王菲

「星」呢指數：★★★★

現年14歲的竇靖童，經常被拍得作中性打扮兼踢波，看似甚男仔頭，但早前她在微博上載「大變身」照片，戴上隱形眼鏡的她長得亭亭玉立，盡得天后媽咪王菲的優良遺傳。

Ricky：「相信佢遺傳咗媽咪我行我素嘅性格，所以着番自己舒服嘅Style已經有佢嘅味道，太刻意跟潮流反而唔啱佢。」

Johnathan：「佢面形好標致，可塑性好高，其實佢唔使太刻意打扮，已經有自己風格，而且佢啱淡淡哋嘅妝容，太濃反而唔好。」

馬詩慧細女王麗嘉 15歲

父：王敏德　　母：馬詩慧

「星」呢指數：★★★★

自小已隨父母亮相的王麗嘉，與家姐王曼喜同樣擁有模特兒骨架。

Ricky：「佢仲好細，可以着得女仔啲，不妨試吓日本Kawaii嘅Style。」

Johnathan：「佢面形好好，條眉好Full好靚，最啱近年好興嘅粗眉妝，只需整理眉毛配淡妝就OK。」

馬詩慧大女王曼喜 19歲

父：王敏德　　母：馬詩慧

「星」呢指數：★★★★

王曼喜現於洛杉磯入讀著名時裝學校，將來打算任職時裝買手。

Ricky：「佢遺傳咗媽咪嘅骨架，Tee襯牛仔褲已經好型。」

Johnathan：「佢個嘴特別靚，化妝不妨Focus喺唇部，好似紅色、粉紅色都啱佢，等嘴唇更豐滿迷人。」

上山詩鈉女兒Hilary 13歲

父：上山詩鈉首任丈夫　　母：上山詩鈉

「星」呢指數：★★★★

與竇靖童青梅竹馬的上山詩鈉女兒Hilary，同樣遺傳了媽媽的靚樣，今年13歲的她，已長得眉清目秀，更不時偕媽咪出席首映，愈來愈識打扮。

Ricky：「佢五官好標致，成個公仔樣咁，好啱日本Kawaii路線，適合着Colourful嘅衫，打造可愛小童星風格。」

Johnathan：「佢個樣有啲西化，即係擁有鬼妹仔樣，除咗自然色Tone嘅妝啱佢，佢嘅頭髮同眼眉都可以試吓啡色，令整體感覺更洋化。」