松岡李那努力耕耘

甫見到短袖子，立刻想到白臂膀、想到全裸體……極致的中國式跳躍聯想。正如台模瑞莎爆出模特兒「陪瞓」實錄，甫見模特兒，竟可三級跳聯想到「陪瞓」，瑞莎不但捍衞不到職業的尊嚴，日模松岡李那又何嘗不是徒嘆奈何？她表示最怕被人誤會而抹殺努力耕耘。

文：ArTing、彤　攝：沈健程、黎志輝

過江龍的日模松岡李那，雖然來港發展日子短暫，但有感模特兒早已被標籤，不少女士夢寐以求的工作，昔日高貴的職業在別人眼中難免被戴上有色眼鏡看待，她說︰「香港太多負面新聞，不過呢啲事冇發生喺我身上，身邊朋友亦冇提及過，我自己過自己生活唔會理人。我只係做模特兒工作，其他嘅事與我無關！」

性感有界限

外界不停聯想，任何事都能化成無限大，縱使模特兒能做到清者自清，也未必可與負面新聞劃清界線。松岡李那說︰「我覺得行性感唔會更加紅，起碼我唔係，我試過做泳衣或內衣嘅工作，但性感嘅工作只係好少，唔明點解會畀人覺得我好性感。我只會為工作考慮性感，要做訪問而刻意去騷性感就唔得。」提到最近在模特兒界中一連串負面傳聞，她堅守不理別人事︰「人哋有人哋嘅做嘢方法，我工作還工作，唔會做其他事去宣傳自己，過火嘅事更加唔使講。」

模特兒工作以外的社交活動及應酬，她十分抗拒，她斷言︰「我只會做有關模特兒嘅工作，出去玩都係跟朋友去，應酬飯局應該係公司去做，而唔係我哋啲模特兒，唔係就唔需要經理人公司啦！」

實力換工作

在松岡李那眼中，來港發展不失為好事，工作機會比以前多︰「喺日本工作乜都要靠關係，單憑個人嘅努力唔夠。我比較鍾意香港嘅工作文化，呢度市場開放，試鏡機會比較多，容易憑個人實力換取工作機會。雖然香港比日本細，模特兒需求量較少，但香港嘅娛樂事業發展蓬勃，加上香港連接內地市場，發展空間好大。」

日本和香港兩地模特兒文化截然不同，模特兒看似失去高貴的定義，經常與性感混為一談，她說︰「日本模特兒分好多種，有行天橋、拍廣告嘅，而行性感嘅就係水着，同香港模差唔多，但我覺得模特兒係要講經驗同條件，係高貴嘅行業，模呢個名字並唔恰當，唔能夠代表模特兒！」

夢想當歌手

工作機會多了，但背後總有辛酸，語言障礙成為松岡李那初來港時的絆腳石︰「嚟香港係我第一次出外工作，初時有好多嘢唔習慣，自己英文唔叻，香港又冇日本朋友，同其他人溝通唔到，感到有啲孤獨。」現在她總算適應下來，還結識一班新朋友。除模特兒工作以外，松岡李那還默默等待機會實現當歌手的夢想。