葉璇戲傳情

葉璇曾與不少富豪傳緋聞，昔日的緋聞女王如今新聞勁減，但她從未為新聞多寡而影響心情。談到感情狀況，她說：「正常！十年如一日，唔會主動識男仔。」任賢齊不時拉攏她與畫家等藝術界人才相睇，可惜太忙而未成事！年過30的她主張順其自然：「唔係想結婚嘅人，從來唔覺係急需，但嚮往浪漫同愛情，同我一齊講電影，講關於電影創作嘅男仔畀我浪漫感覺。」

愛才唔愛財

擇偶標準高，但絕非要富二代，葉璇說：「要有電影才華，要溝通，我鍾意睇戲，帶佢去睇，佢瞓覺就死啦！審美觀要一致，唔識電影就唔使諗。做好耐朋友先拍拖，深入了解性格，品味同審美觀係最重要，仲要靚仔。（富二代？）唔一定，大部分富二代都冇才華，唔係做電影呢行，一定唔係我杯茶。（降低要求？）降低就唔掂當！哈哈！」

言下之意是追求者多籮籮？她春風滿面地說：「OK啦！都多嘅，圈中人多，圈外人少來往。（點追？）有啲會獻殷勤，買嘢就好少，佢哋知道我唔鍾意買嘢，最多請我睇戲，其實都高難度，因為要識戲，如果唔識，睇完口窒窒仲暴露咗添！（招數成功？）Worko架！對戲有共鳴會好得我歡心。（揀導演或製片人做男友？）唔知呢，可能影評人呢，演員都唔知喎！」她在新片中有個性無能老公杜汶澤，想不到現實中亦接受性無能，問到如何解決性需要？她說：「好多方法，睇新戲可以教路，我冇遇過性無能。」

耕耘等封后

近日盛傳佘詩曼等小生花旦離開無綫展翅，葉璇早着先鞭，離巢攻影壇膺金像獎最佳新演員及女配角。問到是否離開而發圍？她說：「唔係！唔同嘅平台，係多咗電影嘅機會。」問到會否回巢拍劇？她推搪說：「暫時未有打算，啲期排到出年年頭。（回巢爭視后？）唔覺得獎係重要，攞金像獎前杜Sir（杜琪峯）同我講攞唔攞獎，我喺佢心目中都一樣，就算攞咗，重要嘅都係尊重，有獎當然開心，但唔係一件了不起嘅事，唔係目標。」

雖則不看重獎項，但在《第三屆新人電影節》封后的她會視金像影后為目標嗎？她說：「唔會好恨，為過程而做，唔係為結果。（冇目標慢人一步？）唔會！相信『不爭是爭』，付出正常代價會得到正常回報。」