中女發圍唔嘢小 夏文汐迷色慾

葉璇與夏文汐再度活躍起來，別以為緋聞沉寂一時的葉璇感情世界回復平淡，實情是大批追求者排隊約睇戲！夏文汐同樣多姿多采，「人妻」魅力不減，蒲吧時吸引老嫩狂蜂浪蝶埋身談心。中女抬頭，絕不遜於80後！

夏文汐（Pat）在美國住了十多年，早前獨自去上海生活，識了很多朋友，頭一年生活多姿多采，幾乎晚晚都玩：「上海有好多酒吧，我會打扮得後生啲去，好多人請我飲酒，多數係外國人，中國人都有，二字頭到四字頭都有！」關於她的婚姻狀況，傳言滿天飛，有說她已離婚，但她在上海期間跟老公感情有增無減：「我同老公會你掛住我、我掛住你，人好矛盾，多見面好討厭，少見面反而好Sweet，男女朋友都係，分開吓先有種掛念嘅感覺。」早前她被拍到跟年輕男子街頭親熱，她表示是公司安排，老公亦很了解，明白製造緋聞是少不免。

夜蒲玩到厭

在上海生活期間，Pat雖然每晚玩得翻天覆地，但亦有厭倦的時候：「晚晚都識好多朋友，不過後來覺得冇乜新鮮感，搞到個人好頹廢，所以想做番嘢。」這段時間，她經常回港，跟以前電影圈的朋友再聯絡：「漸漸識番電影界嘅人，佢哋個個都贊成我復出，話我保養得好好，唔做就浪費！」她直言當初絕無復出念頭，再次拍電影全因機緣：「《出軌的女人》個劇本真係好鍾意！我喺美國住咗十幾年，有一部叫《色慾都市》嘅美國電影係我精神食糧，我會成日幻想自己係其中一個角色，兩套戲感覺上好相似。」

「初戀」陳偉霆

剛復出就拍住影壇新人陳偉霆（William），Pat笑言對方令她尋回初戀的感覺：「同William就真係興奮喇！佢太靚仔喇！身材又好，見到佢個心卜卜跳！」有場戲講述二人談心，擦出微妙火花：「場戲講William想追我，我哋坐喺泳池邊傾偈，諗番起後生談戀愛嘅感覺，令我好陶醉！」曾被封一代性感女神的她自覺感性多過性感：「人哋眼光好重要，性感喺入面，啲人話我畀人好多種感覺，我係比較鬼妹性格。」對於能否憑角色封后，她直言想攞，不過要順其自然：「唔會強求，要夾命水，不過今年係我幸運年，『11』係我嘅幸運數字，最近都拍咗兩套戲。」