襯衫見真章 婷婷詩詩搭出味道

每人都有獨特氣質，要突出個性令人眼前一亮，合適的衣着配搭當然唔少得。本報是次邀得著名舞台服裝設計師姚志康（Andy Daniel）品評女星的衣着，他大讚汪詩詩與謝婷婷擅於挑選配合自己的服飾，而容祖兒則着出個性！

謝婷婷 7分

青春Casual嘅服飾好啱佢呢個年紀着，令人覺得有活力同時不失氣質，如果頭髮再紮起，更加令人覺得青春無敵！

汪詩詩 7分

名模出身嘅佢，深明自己身形上嘅優勢，識得好好運用，簡單同時不失高貴，清新又簡潔，令人睇得舒服。

容祖兒 着出個性 8分

衣着方面向來畀人唔少驚喜嘅祖兒，今次亦唔例外，令人眼前一亮，佢完全了解自己嘅優點同缺點，着出真我個性。

莊思敏 鮮艷青春 6分

呢套衫好襯佢，色彩繽紛，有助帶出青春味道，如果配襯一啲搶眼飾物，更能增添星味！

劉璇 矮上加矮 3分

劉璇呢類「的骰型」少女唔可以着咁多層次嘅衫，視覺上好亂之餘，仲令人覺得矮上加矮！

詩雅 過時失色 4分

個古怪髮型搞到佢走晒樣，條裙唔夠短令人覺得土氣，好似老咗10年咁，有啲似村姑！

鍾舒漫 可愛型格 7分

短頭髮行型女路線嘅佢，着咗呢套衫，畀人感覺型格中帶點稚氣，有新鮮感亦非常順眼。

高圓圓 臃腫腳短 3分

衣不稱身！裙身過長，着唔出優雅味道，對鞋唔夠高又有橫帶，令對腳短一截。衫袖亦唔夠貼，好臃腫！

李菲兒 過目即忘 4分

造型平凡，未能令人留下印象，要有Selling Point先要造型有Talking Point，否則好難認得出。

姚志康Profile

著名舞台服裝設計師姚志康（Andy Daniel）曾與無數歌手合作，92年入行後，他廣泛參與本地及海外媒體工作，並積極拓展設計高級時裝及晚裝，其後創立品牌「Andy Daniel」，為顧客設計日常服飾、晚裝及婚宴禮服。