Bosco豪擲130萬買辣跑

早前與緋聞女友北上拍劇賺人仔的黃宗澤（Bosco），豪擲130萬元購入火紅跑車，昨日更到車行接走新「老婆」！

文：專案組　攝：追蹤組

近年登「陸」掘金的無綫小生Bosco，日前豪擲130萬元購入Audi RS5火紅色四座位跑車，相當富貴！昨日約12時，Bosco偕一名男友人到九龍灣的車行維修部，他們先上樓到玻璃陳列室，車行職員見「貴客」臨門亦識做地預先將車牌掛在新車，「娶」得新「老婆」的Bosco表現得異常雀躍，全程「笑到四萬咁口」，甫抵埗即仔細地檢視新車。約個多小時後，Bosco急不及待駕駛新車接送朋友直駛往西貢「鍊番轉」。據知，Bosco去年對此型號靚車「一見鍾情」，即使車價逾百萬仍無損買車雅興。

對於Bosco另覓「新歡」，「正印女友」胡杏兒並沒打翻醋埕，反因「愛郎」賺到盆滿缽滿而甜笑。問到是否新車的首名乘客？她甜笑說：「吓？冇呀！連佢幾時攞車都唔知。（贊成佢用130萬元買『新玩具』？）吓？唔關我事！我唔知！（佢賺好多？）恭喜佢！我都想買車，反正架車都揸咗幾年，買車係我目標！」

投資有道住得豪

其實Bosco向來投資有道，除了買基金及紅酒保值外，又靠媽咪幫手投資錢搵錢，年前他已捨棄沙田村屋，「升呢」至月租3萬元的火炭千呎豪宅晉名峰。有三層樓揸手的他，估計身家逾千萬港元。