石詠莉靠三級歌打響頭炮

前性感組合Freeze成員石詠莉最近正式單飛，獲唱片公司豪擲6位數字造歌，即唱三級片主題曲，並將以全新性感造型示人！

性感組合Freeze解散後，甄穎珊及陳樂榣各自另尋出路，而獲欽點留低的石詠莉，將以個人姿態推出首張專輯，整張專輯由她包辦，令她感到有壓力：「成隻碟由形象到揀歌都係我自己話事，真係好多嘢要做，不過好多謝老闆咁爽快，畀咗6位數字我造歌，好似我之前幫《3D肉蒲團》唱嗰首主題曲咁，老闆請咗中樂團嚟做樂底，製作好認真，我都係第一次同中樂團合作，好開心！」她預計暑假推出新碟，屆時會以全新形象示人：「性感得嚟唔會太過分，好似Katy Perry咁！」

首嘗單飛即為三級片唱主題曲，但石詠莉不怕影響形象，更指歌手應該好好把握每個機會：「其實首歌好抒情，教現代人唔好咁易放棄愛情！」她自爆是個死纏爛打的人，15、6歲的時候，雖然被男朋友騙財騙色但都心甘命抵：「嗰時佢話冇錢，我咪畀晒啲零用錢佢囉！點知原來佢只係玩我，嗰時我真係喊到豬頭咁！」

自稱「有碗話碗」

雖然單飛很興奮，但石詠莉坦言以組合姿態較輕鬆：「我唔識講嘢，以前都係陳樂榣負責講，就算我講錯都有人幫我！依家就唔同，要學識自己照顧自己、要成熟啲！」早前她爆有女星飯局名單被指博宣傳，但她強調自己冇做錯，自言向來都是「有碗話碗」：「我只係講事實，如果你覺得我是非，係因為你唔了解件事，老闆都冇話過我！」