林峯壓力爆煲冧廠

林峯連日來飽受「床照」流出的煎熬，加上要為新劇《回到三國》開工，昨日終因精神及體力不勝負荷而「冧廠」！

劇集《回到三國》剛開拍不久，林峯飽受與舊愛潘霜霜床照及激咀相流出的壓力，終病倒「冧廠」！昨日原本要到沙頭角拍外景的他，以腸胃炎為由請假，但卻未有到醫院求診，只留家休息，莫非病因並非「食錯嘢」而是「嗒錯女」？

其前緋聞女友鍾嘉欣見「峯」光不再亦不禁出言維護，希望傳媒給林峯空間。今日推出新碟的她，昨日到電台宣傳時繼續被追問林峯的「蜜照」事件，她說：「希望傳媒能夠停止，留啲空間畀林峯，呢個幾禮拜都要不斷回應佢嘅封面，希望大家唔好問咁多，問都問夠啦！」問到是否戥「舊愛」壓力大？她說：「咁一定大壓力啦！上親封面，無論好事、壞事都一定會有壓力，希望大家停一停，唔好再寫呢件事。」

新碟一腳踢

此外，對於有傳有雙性戀的男藝人證實患上愛滋病，嘉欣說：「我唔係好信，可能又係另一個炒作新聞，我唔識雙性戀嘅男藝人，就算係都係大家性取向問題，冇問題喎！」她又透露在新碟中參與作曲、揀歌及監製MV，並邀得姊姊及哥哥參與拍攝加拿大部分。