陳山聰開工風騷到「雲」

陳山聰因與賭王三太長女何超雲傳緋聞，而被封「被包養的賤男」，昨日他首日復工，心情大靚，不時展現勝利笑容，由被封賤男到獲超雲力撐，「勝利聰」此刻手執Chance面靚牌，形勢大好！

陳山聰自與超雲傳緋聞後，被指突然富貴及狠撇前妻，形象插水。昨日他為無綫新劇《我的如意狼君》拍攝外景，展現勝利笑容：「啲報道對我冇影響，我已經收拾心情，會做應做嘅事。（超雲承認同你有聯絡？）我知佢有做訪問，我有打畀佢，同佢講聲多謝同唔好意思，仲話估唔到鍾意豹紋都可以被傳媒拉埋嚟講！（超雲為你澄清？）唔係為我，係件事都影響咗佢，佢22歲仲有好多路要行、有拖要拍。（感情大躍進？）係多咗聯絡，但未至於增進感情，朋友啫！（超雲唔排除發展可能？）呢個世界好難講。（條件啱你？）暫時唔覺，我咁多女性朋友，個個都係對象咩？（有冇發展機會？）唔知！唔敢答，但暫時未有。」

唔識「情敵」 唔搵前妻

山聰在《我》劇演已婚但仍在外面玩的二世祖，問到會否怕角色有負面影響？他說：「個角色幾好玩，唔怕影響形象。（有冇同前妻聯絡？）冇！工作忙，我希望傳媒唔好騷擾我前妻。（對婚姻有陰影？）我會重新學習，人要成長。（有咩想同緋聞情敵周柏豪講？）真係唔識佢！唔想回應，唔想影響其他人。（無綫照肺？）樂小姐知我結婚、離婚，佢叫我收拾心情專心工作。」訪問後，他即時打電話，未知是否向超雲匯報？

另一邊廂的超雲，昨日在微博透露喉嚨不適，但山聰卻未有及時關注。而超雲專用的平治座駕昨午約二時由布力徑大宅直駛珍寶海鮮舫，逗留十多分鐘後又駛回大宅。