E Cup教主鄧伊玲感情危機

「E Cup教主」鄧伊玲（阿旦）將搶閘推出本年度首本o靚模寫真，中門大開騷巨咪，她卻認為不算是最性感的一次，節目主持男友黎國輝（阿感）雖未有詐型，惜感情早藏暗湧，人氣隨「事業線」俱增的阿旦未知會否放盤益宅男粉絲？

鄧伊玲（阿旦）由原本主攻拍廣告、影硬照的平面模特兒，搖身一變成為「E Cup教主」，將於春季搶閘推出o靚界首本寫真，打正旗號以「百果園咪神」陳靜（DaDa）師妹之名自居的她，憑此威名已令一眾宅男引頸以待，窺看她的性感底線是否青出於藍。

與陳靜路線不同

阿旦的寫真不乏內衣及比堅尼，中門大開亦少不免，她在西貢的無人島拍攝婚紗造型時，更邊行邊脫，最後僅以薄薄的頭紗遮胸，有聲冇畫已足以讓人血脈沸騰，但她卻直言未算最性感：「寫真未算係最性感，影嗰時有包袱，我個人保守啲，影內衣都算係第一次，怕大家太注意個胸，唔想目標觀眾只係男仔，希望女Fans都接受。（比DaDa性感？）唔同路線，將佢啲嘢套落嚟未必Work，我唔叻挑逗，我叻在笑容燦爛，健康性感，我哋好老友，唔會比較，係好好朋友。」

阿旦的另一包袱是年紀問題，擔憂不夠青春撼「o靚妹」：「有啲覺得機會嚟得遲，擔心唔後生去鬥，我唔會報細數，比其他21、22，甚至18歲嘅有啲距離，好處係我成熟啲，有一定思想，諗清楚先拋胸，唔係亂嚟。」

視徐若瑄為目標

談到甚麼驅使她行性感？她說：「風氣，對比之前做平面模特兒係另外一樣嘢，我嘅目標係朱茵同徐若瑄。講真，我唔係咁鍾意以胸為賣點，不過佢係我身體一部分，人哋留意就當人哋讚我對眼靚咁，都開心嘅。但人唔可以獨沽一味，想試吓新挑戰。」所以下一個挑戰是夥拍同門的梁雅淳推出甜品烹飪書，力證入得廚房，出得廳堂。

阿旦與主持男友黎國輝（阿感）拍拖多年，即使阿旦正積極建立女神形象，她亦未有將男友收收埋埋，更公開多謝對方的無限量支持：「條路係我自己揀，每個人都有自己嘅路，多謝佢畀我做任何嘢，佢個人冇咩所謂，唔會干預我，淨係支持我，等我少咗不必要嘅壓力。之前有擔心出性感寫真會影響拍拖，怕佢唔鍾意，結果佢同我講啲相都唔係咁勁，過到佢嗰關。」在別人眼中，他們或許情比金堅，但不代表感情穩定，從阿旦的對答可發現他們熱情不再的蛛絲馬迹。問到其理想對象有何條件？她說：「要識諗，可以帶我進步，我有選擇恐懼症，嗰個人要幫我做到決定，當然仲要識氹我啦！」不過她的男友卻與其標準截然不同：「佢好宅男，返屋企就打機，喺鏡頭前好健談，但唔識氹我。」

曾為追求者動心

對於現時的感情，她淡然地說：「拍咗4年幾，依家係一個關口。其實之前開始時冇追求呢個過程，不嬲都唔係熱戀，係一拍即合。」關係更蘊藏暗湧，分手隨時一觸即發！她續說：「共識上有啲唔同，目標唔同，女仔想以結婚為依歸，會憧憬難忘婚禮，但男仔覺得呢啲係繁文縟節，覺得擺酒好麻煩，我想簡單得嚟難忘，唔可以馬虎，佢就冇所謂，所以為呢啲事衝突過。（會分手？）依家唔知將來嘅嘢，不過每個人都想有好姻緣嘅。（多追求者？）都有，買糖水去我屋企樓下等我，又會送盆栽同花畀我。（有下文？）都有一刻感動過嘅。」

模經常與富豪飯局的傳聞扯上關係，令人覺得她們總是貪慕虛榮，但阿旦卻毫不介意過平民生活。問到曾否被邀出席飯局？她說：「真係冇，聽人傳過，唔知係咪真。（怕牽涉入內？）平生不作虧心事，唔怕呢啲，冇做就得。」

後記：背人垂淚？

阿旦的笑容充滿陽光氣息，但不笑的時候，雙眼憂愁，問到是否很悲觀？她說：「我係居安思危嘅人，屋企人教由最壞嗰處諗咗先，我個人唔係唔開心，只係緊張，介意人哋點睇，雖然人哋諗得差，我唔會少咗忽肉，知道冇可能全世界嘅人鍾意我，要學識接受吓。」

Profile

姓名：鄧伊玲（阿旦、Elaine）

三圍：32.5E、24、33.5

身高：160cm