無懼網友圍攻 陳嘉桓認與林峯啱Feel

《葉問前傳》女主角陳嘉桓最近擔任林峯MV女主角，繼而傳出緋聞，陳嘉桓回應時態度曖昧，不單大讚林峯好咀，並了解對方行蹤，揚言若有機會再合作，不排除有發展機會。

陳嘉桓昨晚出席法國嬌蘭唇膏活動，着上Tube Dress性感到場，被問到是否與林峯拍《讓我愛你一小時》的MV，她說：「係，過幾日會公布，個MV喺台灣拍，係無綫主動搵我，好開心。」對於有傳兩人拍拖，她笑說：「係咩？唔係，大家合作好開心，佢知道我拍打戲，成日同我講拍打戲嘅嘢。」陳嘉桓自爆MV中兩人有親熱鏡頭，還大讚林峯說：「佢個嘴好潤，我今次出席唇膏活動諗住送支畀佢，佢好忙，等MV出街可能請佢食飯，因為佢教我好多嘢。（教你乜？）教我點樣拍戲都可以拍得靚過人，仲教我拍電視劇打戲要訣。」

口快快爆行蹤

至於私底下有否與林峯約會，她口說沒有，卻口快快自爆林峯行蹤，她說：「沒私下約會，佢成日Keep住飛。（有冇發展機會？）睇吓有冇合作機會。（係咪你杯茶？）佢係好貪靚嘅人，我係代言Mask，咁我有送Mask畀佢，佢拍親熱戲都要補妝。」並直認林峯是她喜歡的類型。

陳嘉桓因與林峯拍MV而知名度上升，她說：「我知道微博好多人問我係邊個？我想同大家講我叫陳嘉桓。（有Fans鬧你？）我知，但冇刻意睇冇唔開心，入得呢行就預咗，把口生喺人哋度。」

Profile

姓名：陳嘉桓（Rose）花名：妹妹

身高：5呎9吋三圍：32、25、36

出生日期：1992年11月8日

學歷：中五畢業

曾獲獎項：香港公開武術錦標賽銀牌

簡介：14歲加入模界，曾有「嫩口鍾嘉欣」之稱，去年憑電影《葉問前傳》「美慧」一角為人熟悉。