Lenka恨做媽咪啤兩件

唱作女歌手Lenka本周來港進行三日大碟宣傳之旅，開騷會闊別年半的歌迷之餘，亦抽空接受本報訪問。剛於上月結婚的她，自爆恨做媽咪，想生兩件！

相隔近三年再推出專輯，Lenka解構新碟《Two》的轉變：「新碟中加入咗實驗性嘅電子元素，我參與更多創作，大膽發掘自己嘅路線。新碟依然貫徹輕快、活潑嘅音樂風格，帶出正面嘅訊息。」

Lenka正式進軍樂壇前曾演出舞台劇、電視劇和兩部電影，在大學時主修藝術，她分享轉行當音樂人的原因：「我爸爸係玩小號嘅爵士樂手，音樂陪伴我成長。最重要嘅係喺音樂中，我可以做到好多愛做嘅事，好似設計CD封面、寫歌詞、拍MV同唱歌。」對於歌曲經常獲廣告商垂青，Lenka大感開心，因可賺錢之餘，亦令大眾接觸到她的音樂。而酷愛下廚的她最希望可為朱古力廣告寫歌。

倡環保拒生軍隊

Lenka與現任老公James Gulliver Hancock拍拖5年，James亦是其御用插畫師，故每張唱片都是兩人的心血結晶，今次大碟的Logo亦是出自James的手筆。她自覺過去幾年成長不少，比以前硬淨，更強調已婚的身份。Lenka坦言今年以工作為重，其後便會放慢腳步，計劃家庭生活：「我好想生BB，兩個就夠晒數！我都係嚟自四人家庭，而且我係環保分子，地球太多人會破壞生態，所以我唔想生一隊軍隊！」