Selena傳遇襲打腫嘴

加拿大小天王Justin Bieber和Selena Gomez戀情浮面，大前日Justin 17歲牛一時更形影不離，還在Twitter公開戀情。但有指他倆晚膳後離開時，受到Justin狂迷襲擊，Selena用手遮面，嘴唇亦腫起！

大前日牛一的Justin Bieber與女友Selena Gomez，繼手拖手出席奧斯卡慶功派對後，大前日又拖手逛商場，非常甜蜜！逛街後，兩人與好友Chris Brown及Justin祖母食晚飯慶祝，Justin擺明帶Selena見家長，事後更在Twitter留言：「我唔會改變同忘記，我哋一齊嘅旅程先啱啱開始！」但他倆離開餐廳打道回府時，Selena全程用手遮面，嘴唇更些微腫起。

由於有大批記者在門外等候，Justin的愉快晚上隨即幻滅，登車後更豎中指！而前日在Twitter流傳一則以「對唔住Justin」為題的留言，隨即傳出是Justin的瘋狂歌迷因呷醋而向Selena動粗！但Selena發言人指傳言無中生有，她根本沒有受到襲擊，但未就「豬嘴」作解釋。至於一向走乖仔路線的Justin，事後透過Twitter指自己一時衝動才豎中指，更知衰而作出道歉。

酒店度春宵

雖然當晚Selena和Justin未能盡興，但其實兩人已暗地裏提早慶祝。有傳他倆在無敵沙灘景的酒店撐枱腳，Selena更對Justin說：「生日快樂哦Baby，你想做乜都得，因為係你生日！」更不時咀嘴及互餵！其後兩人又拖手到沙灘看海，再一同回到總統套房。此外，Justin早前亮相名嘴艾倫迪珍妮絲節目時，將自己的頭髮放上網拍賣籌款，現以4萬668美元（約31萬7千港元）成交。

另一邊廂，有「迷你Justin」之稱的Matty B自拍唱歌短片，但並非唱其作品，而是學Eminem般唱Rap歌。