陳豪唔覺Mandy有變

李澤楷昨日突然發聲明交代與梁洛施（Isabella）的感情關係，不少藝人均對兩人「分訊」大嘆可惜！

陳豪：Mandy同李澤楷傳緋聞，我嘅宗旨就係唔好八卦人哋嘅嘢，頭先我同Mandy傾偈，佢同以前一樣冇變，好似冇乜嘢，唔似有受到咩煩擾。

陳敏之：最緊要小朋友健康成長，感情嘅嘢，外人好難分對錯。（想要有錢男友？）我唔會睇錢，要錫我同溝通到。

洪卓立：我同Isabella只係見過幾次，人哋家事真係要畀空間佢哋，唔好過問咁多。

黃婉曼：昨日嘅分手，今日嘅相遇，都唔係外人可以評論，感情係兩個人嘅事，唔知Mandy同李澤楷係咪一齊，知嘅話一早巴結咗Mandy！喺now嘅同事裏面，最早識Mandy，同佢都熟，但唔係知己。冇留意佢係咪春風滿面，冇乜特別話富貴咗，等我返去留意吓！

周秀娜：有留意佢哋分手嘅報道，都幾慘！應該係兩個人嘅事，依家變咗七百萬人嘅事，希望BB健康成長，唔好影響到佢哋嘅生活。

黃宗澤：大家畀啲私人空間人哋啦！人哋一家人，家家有本難唸的經，私人事唔發表意見，知道佢哋分手都好驚訝，起初以為佢哋會好耐，又啱啱生咗BB，真係好可惜！佢哋兩個幾有夫妻相。

泳兒：我唔會八卦佢哋點解分手，係佢哋私人問題。總之希望佢哋將來生活開開心心，三個小朋友健健康康。

謝天華：呢啲咪有錢人嘅煩惱，有感情一齊又話為錢，分手就話有分手費，即使唔係，外界都會係咁講。（恨有呢種煩惱？）呢啲嘢冇人想恨，分手唔係開心事，一家唔知一家事，有啲可惜，啲小朋友出世冇耐。

鄧紫棋：有留意分手報道，但冇咩感想，感情事外人好難評論。我冇想過嫁有錢人，如果鍾意嘅話，無論佢有錢定平凡都會鍾意。我係有情飲水飽嘅人，就算「貼仔」都冇所謂，但如果佢鍾意你，會因為想照顧你而努力，唔擔心呢啲問題。