超雲牛一柏豪冇禮

昨日22歲生日的賭王千金何超雲，前晚與媽咪三太陳婉珍及親友到銅鑼灣食飯慶祝。及至晚上十時，壽星女與媽咪離開餐廳，問到收到甚麼禮物？超雲即展示右手食指上的黃鑽戒指：「今晚食咗晚飯，聽日（正日）應該會平淡啲！」再問到緋聞男友周柏豪有否送禮時，她擰擰頭說：「不過佢有同我講生日快樂！」其後與女友人前往上環信德中心「過大海」會朋友，說罷便入閘離開。

至於周柏豪昨日出席活動時，對於超雲生日竟顯得不知情：「真係唔知喎！作為朋友會Send短訊祝佢生日快樂！（買禮物？）冇時間買，有機會先啦！」明顯跟超雲口供唔夾。對於超雲在微博上載99支紫色玫瑰花，暗示有追求者，柏豪說：「咪咁好囉！送花者一定唔係我啦！（甩難？）由頭到尾我唔覺係一個難！」此外，他又承認於情人節跟吳雨霏約會，但雙方只是相識逾十載的朋友：「要發展早就開始，唔使等到依家！」

柏豪竟表示忘記超雲生日，相當抵打。

超雲（左）與三太笑到四萬咁口，果然有母女相。

超雲以駁髮低胸Look慶祝生日，並大晒黃鑽戒指，身形及身家同樣豐滿。