志偉領軍爆笑再奪票房No.1

曾志偉繼去年賀歲片賣座冠軍《72家租客》後，今年再策動無綫全台上下大星小星，炮製出「冇得輸」的賀歲片《我愛HK開心萬歲》，果然又一次成為賀歲片冧巴溫。

電影講述吳順（梁家輝飾）因破產，遂重返屋邨生活，而曾挾款走佬多年的托水龍（曾志偉飾）亦重返屋邨，更提出村民集資進行活化，成功令屋邨重現生氣，但大財團卻提出收購屋邨所有店舖，街坊人心惶惶，此時，托水龍竟再一次挾款私逃……

賀歲喜劇劇本從來不必驚天動地，只要有兩、三個大爆笑點撐起，若干啜核對白、小Gag位貫串即可。《我》片的戲軌雖與《72》片有點似曾相識，猶幸笑位不絕：吳君如舌玩iPhone、阮兆祥與盧覓雪扮孖妺等，即使後者類似《荃加福祿壽》時已然見過，但仍甚具笑位。

無綫近年雖然經常被鬧冇新意兼求其，但這齣由無綫花旦、小生、甘草合力翻炒《72》戲軌的冷飯，就像一部具影相、聽歌、打機、睇片、上網的多功能手機，總有一瓣你會Buy，促成志偉憑《我》片再一次蟬聯賀歲片票房冠軍。