Kelly佗孖女 重十幾磅

懷孕4個多月的「潮媽」陳慧琳，昨晚在活動上宣布腹中「孖寶」是女兒！事業、愛情如魚得水的她，繼誕下「蝦餃仔」劉昇後，再以人工受孕圓生女夢，成為幸福女人的最佳典範！

陳慧琳（Kelly）上月宣布以人工受孕方式成功懷有孖胎，昨晚她腹大便便現身Audi汽車活動，除介紹全新的Audi A7 Sportback五門轎跑車外，還正式公布腹中「孖寶」是女孩，一圓她的生女夢！

雖然佗着兩位小千金，但Kelly依然腳踏2吋高踭鞋，並以白色短裙仔騷長腿，她甜絲絲說：「今次兩個都係女，唔使再生。（收爐？）順利生完呢兩個就係啦！3個喇喎！仲生咩？」她坦言由第一胎開始已恨女，而孖女比龍鳳胎更好，不會令她偏袒任何一方。她透露懷孕至今已重了十幾磅，而孖胎亦非常健康：「今次個肚比上一次墜咗，同埋好快大，醫生特別開雙倍分量嘅鈣片畀我。（點補身？）勁飲奶，食粟米片、鈣片同飲湯囉！」

被禁抱蝦餃仔

Kelly趁安胎期間多陪「蝦餃仔」劉昇，她說：「佢未知發生咩事，我諗住臨生之前話佢知，依家只可以攬吓佢，因為老公唔畀我抱！（減少工作量？）簡單工作可以嘅，錄音都可以，但跳舞就唔好預我喇！」她已為孖女購置用品及床仔，並努力執屋，為她們騰出一間房間：「衫仔、奶樽同床仔都要打孖買，我哋會請陪月員，希望搵個有湊孖胎經驗嘅。（餵人奶？）係呀！照餵！（擔唔擔心奶水唔夠分？）盡力而為啦！冇得擔心，未諗點谷奶，都係努力食住鈣片先！」Kelly下嫁圈外男友劉建浩（Alex）後努力造人，前年暑假誕下「蝦餃仔」劉昇，今次再博得兩個囡囡，幸福指數爆燈！

活動中介紹的Audi A7 Sportback五門轎跑車，外形設計源自69年經典大型斜背100 Coupe S，兼具跑車的流暢線條及旅行車的實用性，令眾嘉賓讚不絕口。