DaDa家輝冇強積金戶口袋少6千

新一年度的財政預算案宣布注入6千元至每個強積金戶口，令不少圈中人怨聲四起，其中袁詠儀與杜汶澤等直言寧願即時派錢，而張家輝及陳靜更因沒有強積金戶口而未能受惠！

財爺曾俊華昨日公布2011至2012年度財政預算案，不少圈中人大為關注，惟預算案並無提出退稅等惠及中產人士的措施，亦沒有即時派糖，僅向所有強積金戶口注入6千元，未能達致還富於民！

袁詠儀直言對預算案不滿意，連珠炮發說：「入6千蚊去強積金戶口受惠唔到，就算係其他人都要等到六十幾歲至攞到，點解唔依家畀，等人解決問題呢？咁多年後可能只值6百，依家大家都對抗唔到通脹，6千蚊畀啲中等家庭幫阿仔交學費都好吖！」至於免差餉一年，她無奈地說：「唔關我事，因為我租屋住，原本想買車，依家加稅咪唔買囉！電費補貼千8蚊好過冇，冇糖派，叫做有粒朱古力豆。」

杜汶澤促派Cash

向來不平則鳴的黃秋生，則寸爆財爺及眾高官：「好呀！放入強積金有用嘛！咁不如掉番轉，佢哋將強積金嘅錢拎出嚟畀番我哋，等我哋65歲還番畀佢哋啦！（加煙稅？）非常好，你有需要，煙仔咪係必需品，冇需要咪係奢侈品，咁加法，咪逼啲人知法犯法，鋌而走險去買私煙囉！加紅酒稅仲好，啲高官鍾意飲紅酒，實畀得起錢。」

而杜汶澤與袁彌明亦寧願直接派錢給市民，阿澤說：「效法澳門仲好，畀現金令市民開心啲，現金係醫治情緒最好方法！」袁彌明則說：「一嚟唔係即刻攞到，二嚟有啲強積金戶口持有人唔係本地居民。（加煙稅？）我覺得加太多，乜政府唔係鍾意循序漸進嘅咩？」

任達華：錯誤決定

年輕一輩的o靚模亦有留意預算案，其中「百果園咪神」陳靜（DaDa）亦贊成派現金：「入錢落強積金戶口，我受惠唔到，我都冇戶口！而且冇得退稅，真係有啲失望，而加煙稅對我就冇影響，因為我戒咗好耐。」任達華與杜琪峯亦轟預算案對中產人士零幫助，任達華說：「強積金根本就係錯誤決定！」而張家輝亦未能受惠：「我冇強積金戶口，受惠唔到，我覺得政府要還富於民，可以節省無謂開支，好似大年初二嘥幾百萬放煙花，用呢啲錢去扶貧仲好！」至於曹永廉則在微博狂轟：「我為財爺禱告，財政預算完全不及格，得益人幾多？對答不知所謂，不如返屋企食飯算吧！」