攻日一擊即中王梓軒情歌冧瀛女

唱作歌手王梓軒（Jonathan）做了安室奈美惠師弟，為了攻陷日本市場，他更向Luna Sea埋手偷學冧女招數。

王梓軒將於4月推出處男日文細碟，收錄兩首歌曲，早前專程去日本錄音，一落機即入錄音室踩足9粒鐘，花了兩日時間才錄完兩首歌，製作嚴謹，Jonathan對新碟抱有很大期望，希望一擊即中攻陷日本市場。

睇Luna Sea學嘢

去年加盟日本avex，有幸成為安室奈美惠師弟的Jonathan，唱片公司為了幫他打入日本市場，特別度身訂造一首冧女情歌，他說：「呢隻係慢歌，日本同事話一定要有首冧女歌，要少女至阿嫲唔同層面嘅女性都鍾意，有次同事特登帶我睇Luna Sea演唱會，全場除咗妹之外，仲有好多銀髮組人，佢哋全部都睇到好陶醉。」另一首則是舊歌新唱，他挑選了殿堂級歌手布施明的金曲，希望給日本人一個親切感，他說：「喺日本完全冇人識我，翻唱布施明嘅金曲，年輕人可以當新歌聽，年紀大嘅人會覺得我尊重佢哋文化。」