DaDa上網獵仔無懼騙色

在家度過單身情人節的陳靜，昨日自爆擇偶首選靚仔，更曾上網識男仔，不擔心被騙色，她說：「我會好小心嘅。」

陳靜（DaDa）昨日與洪天明舊愛梁詠茵（Lillian，前名梁郁霖）出席《元宵極速約會派對》，談及約會對象，DaDa坦言首選靚仔，而Lillian則要求對方有幽默感。提到剛過去的情人節，DaDa說：「因為天寒地凍，加上有啲唔舒服，所以同家人食飯之後就返屋企休息。（試吓極速約會？）以前有上過交友網識朋友，但未試過出嚟，有機會都想試吓，可以識多啲唔同類型、層面嘅人，識多啲朋友。（有啲只係想上床喎！）我會好小心嘅，雖然我依家冇拖拍，但未必會用呢啲方法識男仔，或者等屋企人、朋友介紹啦！」

唔怕靚仔花心

DaDa自爆「貪靚仔」全因媽咪教落：「有得揀梗係要靚仔啦！（揀靚仔定有錢？）都係靚仔，錢可以自己搵，而且我好知足，簡單生活仲舒服。」問到會否擔心靚仔花心，她說：「媽咪話靚唔靚仔都花心，醜嘅都花心啦！我身邊有朋友係咁，所以點都揀靚仔。」至於Lillian則自嘲不懂說話，所以喜歡幽默的男孩逗她開心，她透露舊愛最愛講爛Gag氹她，現時則未有男友。