黑超蔡楓華Chok住重生

蔡楓華昨日精神奕奕出席演唱會記者會，被指患有青光眼及精神有異的他兩度說：「我冇事，蔡楓華非常之好。」 文：音樂組

下月26日假Star Hall舉行演唱會的蔡楓華（Ken），昨日戴黑帽及黑超出席記者會，明顯瘦了一個碼的他不時扮Chok擺甫士，他先與在場人士打招呼，並說：「好長時間冇開個唱，希望大家畀多次機會蔡楓華，蔡楓華會重新出發。」Ken在盧敏儀及孫敬安陪同下接受訪問，全程有紋有路，問到開騷有否壓力？他說：「冇，平常心，依家希望作歌出新碟，最想走埠登台。」

出書爆血淚史

他還透露正籌備推出新書：「寫我過去十幾年痛苦經歷，都幾有趣，應該賣得。」孝順的Ken更邀母親睇騷，他說：「呢個世界最珍貴係親情。」聲稱年前遭人打傷眼的Ken，坦言是次開騷只為報答歌迷，至於右眼傷勢如何？Ken說：「失去少少視力，表演仲控制到，依家需要覆診。放心我冇事，做個手術搞掂，大家放心，蔡楓華非常之好。」之後，Ken在盧敏儀陪同下為今晚《勁歌金曲》錄影綵排，接着到電視台接受訪問，期間有Fans上前索簽名，Ken亦親民地一一答應，而晚上他再到佐敦打邊爐。