基仔英皇春茗獻金大牛險勝林峯

英皇老闆楊受成前晚在公司春茗上，「現兜兜」捐出4萬大元作大抽獎，而兩位「英皇一哥」也排隊奉獻，最後古巨基比林峯捐多5百元，實行與眾同樂！

英皇前晚筵開31席舉行春茗，除容祖兒及謝霆鋒身在外地未有出席外，古巨基（基仔）、林峯、蔡卓妍（阿Sa）、鍾欣桐（阿嬌）、陳偉霆、泳兒、鄭希怡及鍾舒漫（Sherman）等赴會，星光熠熠！

鍾舒漫抽中3千

全晚最令人熱血沸騰的環節，當然是現金大抽獎，楊受成前後共捐出4萬元，杜汶澤再「揼」群星心口捐錢，基仔一擲3千元，本打算與基仔「睇齊」的林峯，因遭人阻止而慳番「5舊」（5百元），阿Sa就出2千元，結果Sherman抽中3千元，陳家樂則擸走40吋大電視，認真Lucky！而藝人管理部的高層Kitty媽更壓軸演出，扮演台灣「電音天后」謝金燕大唱《嗶嗶嗶》，全場爆笑！

席間，吳雨公布兩大喜訊，除了林欣彤加盟英皇之外，更宣布英皇成立演藝創作學院，令跟Twins、林峯及老闆齊齊坐主家席的基仔大感興趣：「我最有興趣修讀經理人課程，唔係為簽新人鋪路，最想教授幕後音樂製作！」對於林欣彤加盟英皇，他為公司簽得實力新人而感到開心。

阿嬌唔敢高攀

另一邊廂，林峯否認早前返廈門相睇，他呼冤：「我只係返去拜年咋！（阿嬌都話你有大把異性排隊？）個個都以為好多人排隊，其實冇o架！」但他直認其父要求高，亦認同需要「竹門對竹門」：「門戶啱，思想較接近，容易溝通！」他更坦言已很久沒有拍拖，問到是否繼李彩華之後就沒有？他嚇得尷尬苦笑說：「你哋搞到我標晒汗！」他表示曾遇到有好感的對象，只是沒有行動。另外，眼見阿Sa蜜運中，阿嬌不禁大呻孤單，有謂林峯是「筍盤」，她竟自嘲「高攀唔起」！