孫耀威婚享

入行18年的孫耀威，回流返港後作出不少突破，由過往被定位為偶像歌手，成功轉型為偶像派實力歌手，近年還再進一步，進身為唱作歌手。在今年初的樂壇頒獎禮上，Eric擸了不少唱作歌手獎，當中叱咤唱作歌手銀獎，更是苦等十多年才拿到，令他嘗到收成正果的滋味，吐氣揚眉，他說：「我寫咗歌好多年，以前喺大學有夾Band，入行後去咗台灣發展，但冇人打算或夠膽用我啲歌，嗰時被定位為偶像歌手，只要唱好情歌同排好舞，着靚仔啲已經OK。」經過歲月洗禮，Eric苦心經營終得到回報，加上遇到好公司讓他發揮所長，令他不再局限偶像歌手框框，轉型成功。

再起飛闖紅館

Eric表示不抗拒被封為偶像歌手及情歌王子，但認為偶像與實力可兼備：「好似哥哥張國榮，兩者兼備。（少唱情歌？）唔會。」他現時埋首創作，問到會否靈感「乾塘」？他說：「創作係好隨心，唔好構成壓力，唔好限死一個狀態。」問到現時處於哪個位置？他說：「出道時『嘭』一聲上位，之後一路跌，唔知自己做乜，之後專注拍劇練演技，似演員多過歌手，不過知名度提高咗，去到今時今日，終於有突破，創作得到認同，係音樂再起飛嘅階段。」他直言距離踏上紅館之路不遠矣！

宅男宅女絕配

事業穩步上揚，Eric的愛情生活亦甜蜜溫馨，與陳美詩（Macy）拍拖年多，感情穩固，早前他在頒獎禮公開愛的宣言，向女友說「I Love You」，骨痹但情深。他認同有愛情滋潤，人會容光煥發：「我哋相處得好舒服，各有自由空間，工作同私生活都有晒默契，有時會返屋企睇DVD，一啲都唔悶，係好舒服嘅拍拖方式。」他笑言與Macy是「宅男」和「宅女」的「絕配」代表。明天是情人節，問到會否憑歌寄意送給女友？他說：「未呀！唔使咁刻意！（Fans接受拍拖？）大部分Fans都明白事理。（談婚論嫁階段？）咁又未，仲有太多嘢想做，可能三年後啩！唔會刻意隱瞞或公開婚訊。」

髮型：Sunny Yu@Hair Culture

化妝：Andy Leung@make360.com.hk

服裝：ink-clothing.com