JC迎情人節起勢咀男友

警鐘胸名模Jessica C. （JC）和模特兒男友Sergio享用情人節大餐，餐前手拖手兼咀到「啜啜」聲，用餐時又攬又互餵，一顆士多啤梨也要兩份吃，手口並用，四目交投，吃到高潮迭起。

名模JC和Sergio拍攝當天不乏肉麻骨痹場面，毛管戙指數持續高企。JC和Sergio不時手拖手，四目交投，用餐時Sergio主動餵女友食法式雲呢拿千層酥，JC亦禮尚往來，細心地把柚子日本帶子切開一小片餵食。當Sergio讚她善解人意時，JC即嬌嗲的反問：「外表呢？」他即撫摸JC的秀髮，一臉憐惜的說：「當然係最靚！」

情人知己未諗結婚

JC和Sergio異口同聲說不記得度過第幾個情人節，JC說：「佢係愛人亦係知己，我做乜嘢佢都支持同愛護。喺呢一刻，我可以答你佢係完美另一半，但暫時我哋唔會刻意計劃結婚，要嚟就嚟，婚姻應該係喺自然同舒服情況下發生；情人節嗰日未知點度過，或者我會焗蛋糕，大家睇吓影碟、傾吓偈，可以喺一齊已經係最好。」

問到是否一見鍾情？JC和Sergio均說是對方主動追求。JC說：「喺新加坡我同一班模特兒住喺公司宿舍，有日Sergio嚟到，即刻有女模話要去睇佢，所以我先去睇，第一眼覺得佢好Cute，之後就覺得佢扮Cool。」Sergio則反指是JC採取攻勢，記得大夥兒去Clubbing時，是JC主動要跟他跳舞。

工作分離傷心嚎哭

JC說拍拖不久，男友便要到外地工作：「送機時我喊到豬頭咁，好唔捨得，當時朋友仲笑我『佢去做嘢又唔係去死，使乜咁傷心！』」Sergio笑說：「當時佢喊得好厲害，機場旅客都以為我蝦佢！」

最令JC窩心的莫過於Sergio輕喚一聲：「Linda！」Sergio說：「Linda係西班牙名字，意思係美麗女孩，喺我心目中佢係世上唯一最美嘅。」JC聽罷即輕吻男友說：「我叫佢做Amour，係法文，意思係愛情。」