甄子丹全副身家畀晒老婆

黃百鳴監製的《最強囍事》票房報捷，昨晚舉行慶功，甄子丹、古天樂和杜汶澤繼續為電影造勢，席間甄子丹亦表示全副身家交給老婆。　　　

經過四天紅假，香港戲院商會提供的資料顯示，票房排行前六名為《我愛HK開心萬歲》、《最強囍事》、《青蜂俠》、《魔髮奇緣》、《新少林寺》及《神奇俠侶》（詳見附表）。票房報捷，黃百鳴昨晚拉隊筵開26席慶功，主要演員甄子丹、古天樂和杜汶澤等均有出席，現場安排抽獎環節，氣氛熱鬧。杜汶澤擺熊黛林和郭富城的緋聞上枱開玩笑：「我對唔住佢兩個，戲中我喺熊黛林面前露股，我知佢睇慣啲起晒坑嘅，但今次佢要睇坑腩。」

另外，甄子丹滿意票房成績，他說：「2月14日我會請假返香港同太太（汪詩詩）過，我將副身家畀晒佢啦！兩公婆冇所謂，因我理財冇佢咁叻。」而戲中飾演化妝師的古天樂，其乸型造型深入民心：「過年啲親友嚟拜年，叫我扮乸型又要同佢哋化妝，依家仲有部戲搵我做女人嘅！我度緊期。」

等情人節反超前

對於票房數字，黃百鳴坦言全球統計已超越曾志偉：「香港方面佢哋有強勁宣傳平台，上映戲院多過我哋，無可厚非。不過佢哋做街坊生意，情人節就到，我哋會吸引情侶觀眾入場，有信心反超前。電影喺內地上映8日過億，期望有2億票房。而馬來西亞收約600萬港元，新加坡收36萬坡幣。全球計我贏曾志偉o架！（裸跑？）佢自己裸啦！」另外，曾志偉亦從外地返港，於今晚為《我》片搞新春團拜，與演員晒冷再谷票房。

票房排名榜（2月3日至6日）

第1位《我愛HK開心萬歲》收$10,453,054

第2位《最強囍事》收$8,558,694

第3位《青蜂俠》收$6,679,176

第4位《魔髮奇緣》收$5,859,377

第5位《新少林寺》收$4,248,181

第6位《神奇俠侶》約收$421萬元