Carol見好就收跟「峰」停戰

兔年銳意「打入」影壇的「浸大E神」楊梓瑤（Carol），早前以性感打扮為本報寫揮春，對於「前輩」周秀娜今年「罷拍」寫真集，Carol說：「咁咪好囉！大家都見好就收！（狙擊佢？）唔係！新年唔好講人哋喇！只係想趁後生試多啲嘢，再決定之後嘅路點行！」去年寫真銷量成績理想的她表示，因要兼顧學業及拍戲，今年決定跟娜姐「停戰」：「寫真集嘅尺度比較踩界，我又返緊學，都唔係太想再出寫真集。始終都係拍戲好啲，可以學多啲嘢！（拍打戲唔怕上圍負荷重？）梗係唔會啦！平時跑步都冇影響，依家已經跟師傅學武！」

情人節將至，與圈外男友感情穩定的Carol，期待男友炮製驚喜：「我好享受呢個節日，因為好浪漫。男友平時好細心，相信佢會準備好多節目畀我！（想唔想收鑽戒？）都想o架！有男仔送戒指好幸福！我都準備咗一份禮物，不過唔講得住。（等男友慢慢拆？）係呀！（着性感啲畀驚喜佢？）佢唔鍾意我咁性感，所以我平時出街都好密實！」